13 лютага, Мінск /Кар. БЕЛТА/. У эфіры тэлеканала СТБ Надзвычайны і Паўнамоцны Пасол Беларусі ў Расіі Дзмітрый Крутой расказаў аб выніках гандлёва-эканамічнага супрацоўніцтва Беларусі і Расіі за мінулы год, а таксама зрабіў прагноз на 2023-і, паведамляе БЕЛТА.
"Мінулы год атрымаўся рэкордным у гандлі з Расіяй. Было некалькі базавых задач, якія паставіў Прэзідэнт і ўрад. Асноўная з іх - пераарыентаваць $6,5 млрд з еўрапейскага і ўкраінскага рынкаў на Расію. Гэта задача выканана ў поўным аб'ёме. У лічбах, калі браць у доларах, экспарт у Расію ў нас вырас на 40,5 працэнта, у натуральным выражэнні - на 10,5 працэнта, калі браць фізічныя аб'ёмы", - сказаў Дзмітрый Крутой.
На яго думку, 2023-і будзе не менш выніковым, чым мінулы. "Вядома, чакаць да дасягнутай высокай базы мінулага года такіх жа тэмпаў, напэўна, было б няправільным. Але рост тавараабароту, калі мы лічым яго галоўным паказчыкам нейкага развіцця, на ўзроўні 6,5 працэнта будзе вельмі добрай лічбай да той высокай базы, якая ўжо дасягнута", - дадаў пасол.
Дзмітрый Крутой звярнуў увагу на тэму бар'ераў у двухбаковых адносінах. "Тэма бар'ераў пастаянная. Мінулы год, вядома, у гэтым плане быў лепшым. У першую чаргу гэта датычыцца сельгаспрадукцыі. Мы знайшлі інструменты, думаю, у гэтым годзе ў першым паўгоддзі мы канчаткова падпішам парадак, па якім нашы прадпрыемствы на расійскім рынку (у першую чаргу тыя, якія займаюцца перапрацоўкай сельгаспрадукцыі) будуць працаваць у вельмі дакладных і зразумелых умовах. Ужо не будзе нейкіх адыёзных рашэнняў па закрыцці. Па прамысловасці: каб не было бар'ераў у рамках саюзных праграм па выбудоўванні адзінай прамысловай палітыкі, было падпісана важнае пагадненне. Гэта ўлік тэхналагічных аперацый, каб наш тавар прамысловы не лічыўся замежным у Расіі і мы атрымалі доступ да праграм субсідзіравання федэральнага і рэгіянальнага ўзроўню. Літаральна гэтымі днямі будзе падпісана пагадненне аб адзінай прамысловай палітыцы. Думаю, гэтыя базавыя і новыя пагадненні яшчэ больш зменшаць колькасць бар'ераў на расійскім рынку", - адзначыў Надзвычайны і Паўнамоцны Пасол Беларусі ў Расіі.-0-
