10 красавіка, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой расказаў, што гаварылася аб фарміраванні адзінай плацежнай прасторы на пасяджэнні Вышэйшага дзяржаўнага савета Саюзнай дзяржавы, якое прайшло ў Маскве 6 красавіка з удзелам Прэзідэнта Беларусі Аляксандра Лукашэнкі, паведамляе карэспандэнт БЕЛТА.
"Што датычыцца грашова-крэдытнай палітыкі, то тут асноўныя акцэнты былі зроблены на фарміраванні адзінай плацежнай прасторы. Прэзідэнты заслухалі, як ідзе работа па павелічэнні долі разлікаў у нацыянальных валютах: гэта быў такі краевугольны камень нашай усёй антысанкцыйнай палітыкі - з мінулага года ў нас ужо 85 працэнтаў гандлю ажыццяўляецца ў нацыянальных валютах. Далажыліся адпаведныя службовыя асобы па рабоце над механізмам абмену фінансавымі паведамленнямі, па ўкараненні сістэмы хуткіх плацяжоў, тэме "Мір" - "Белкарт", па барацьбе са злачыннасцю ў фінансавай сферы і сістэме, як гавораць нашы банкіры, нагляду або фарсайта за плацежным рынкам і трансгранічным перамяшчэннем грошай. Тут быў зроблены акцэнт, каб усё ж такі грошы за гандлёвыя экспартна-імпартныя аперацыі паступалі максімальна хутка, нягледзячы на абмежаванні па многіх нашых ключавых банках", - падкрэсліў Дзмітрый Крутой.
Ён адзначыў, што ў пытаннях грашова-крэдытнай палітыкі Саюзная дзяржава каардынуецца з тымі рашэннямі, якія прыняты ў рамках Еўразійскага эканамічнага саюза. "У нашай "двойцы" мы, безумоўна, павінны памятаць у тым ліку і аб Еўразійскім эканамічным саюзе. У рамках "пяцёркі" ў нас у доўгатэрміновай перспектыве ставіцца як асноўная мэта пераход усіх краін на рэжым інфляцыйнага таргетавання. У нас у Беларусі пакуль выкарыстоўваецца рэжым манетарнага таргетавання", - сказаў пасол. На яго думку, у рамках "двойкі" гэта стратэгічная мэта можа быць дасягнута бліжэй да 2025 года.-0-
