2 сакавіка, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой 2 сакавіка наведаў з рабочым візітам Краснаярскі край, паведамілі БЕЛТА ў прэс-службе дыппрадстаўніцтва.
Ключавым пунктам праграмы быў удзел пасла ў рабоце штогадовага Краснаярскага эканамічнага форуму, тэматыка якога прысвечана пытанням развіцця Сібіры з улікам бягучай эканамічнай і геапалітычнай сітуацыі. Дыскусійныя пляцоўкі праходзяць у кантэксце пашырэння знешнеэканамічных сувязей, раскрыцця інвестыцыйнага, навуковага і прамысловага патэнцыялу тэрыторыі.
На палях форуму Дзмітрый Крутой правёў шэраг сустрэч з кіраўніцтвам расійскіх рэгіёнаў. Так, са старшынёй урада Іркуцкай вобласці Канстанцінам Зайцавым абмяркоўваліся пытанні развіцця дасягнутых раней дамоўленасцей, перспектывы ўмацавання супрацоўніцтва ў рамках дзеючай паміж Беларуссю і Іркуцкай вобласцю двухбаковай рабочай групы па развіцці ўзаемавыгаднага партнёрства.
"Канстанцін Зайцаў падкрэсліў, што для рэгіёна Беларусь застаецца адным з вядучых партнёраў у гандлёва-эканамічным, навукова-тэхнічным і культурным супрацоўніцтве Іркуцкай вобласці і краін Садружнасці Незалежных Дзяржаў. Пашыраюцца пабрацімскія сувязі і ўмацоўваецца міжмуніцыпальнае супрацоўніцтва. Рэалізаваны сумесны праект віртуальнага гандлёвага дома "Іркуцк - Брэст", на пляцоўцы якога працуюць 11 кампаній ад Брэсцкай і Іркуцкай абласцей", - расказалі ў прэс-службе.
"Важна, што наш дыялог працягваецца і мы знаходзім новыя кропкі для развіцця двухбаковых партнёрскіх адносін. Мы імкнёмся да таго, каб узмацніць эканамічную кааперацыю паміж Беларуссю і Іркуцкай вобласцю. Ёсць беларускія прадпрыемствы, у тым ліку з аўтамабільнай галіны, якія ствараюць у рэгіёне філіялы. У гэтым плане важна не толькі набываць тэхніку, але і мець магчымасць абслугоўваць яе на месцы. Тое, што эканамічныя паказчыкі растуць, гэта вынік эфектыўнай сумеснай работы і пошуку ўзаемавыгадных умоў, і не толькі ў эканамічным сектары", - звярнуў увагу Канстанцін Зайцаў.
"Самая бліжэйшая тэма, дзе мы будзем супрацоўнічаць, - гэта авіябудаванне. Іркуцк з'яўляецца адной з ключавых кропак авіябудаўнічага кластара Расійскай Федэрацыі, таму ў рамках візіту нашага прэм'ер-міністра будзем абмяркоўваць магчымасці работы па гэтым напрамку. Яшчэ ёсць сумесныя інтарэсы ў пытаннях жыллёва-камунальнай гаспадаркі, перапрацоўкі адходаў. Дамовіліся, што нашы прадпрыемствы, якія выпускаюць адпаведную тэхніку, прадставяць свае магчымасці. Ёсць планы па развіцці сумесных праектаў у рамках фармацэўтычнага медыцынскага кластара. Брэсцкая вобласць у нас вызначана галоўнай за супрацоўніцтва з рэгіёнам", - адзначыў Дзмітрый Крутой.
У час наступнай сустрэчы з губернатарам Краснаярскага края Аляксандрам Усам пасол сфакусіраваў увагу на пастаўках усяго спектра беларускага пасажырскага транспарту, самазвалаў для кар'ераў краю, абнаўленні ліфтавага парку горада па праграме рэнавацыі, інавацыях у аграрнай сферы.
"Мы з губернатарам канстатавалі, што пакуль мы толькі аднавілі той тавараабарот, які ў нас быў да пандэміі. Але гэтага яўна недастаткова з улікам тых магчымасцей, якія з'явіліся для работы ў гэтым рэгіёне. Першае - гэта добры бюджэт: ужо некалькі апошніх гадоў ёсць дадатковыя даходы і магчымасці як на ўзроўні ў цэлым рэгіёна, так і на ўзроўні горада Краснаярска. З'явіліся пэўныя субсідыі для куплі розных відаў тэхнікі, што выкарыстоўваюцца менавіта ў гэтым рэгіёне. Таму губернатар справядліва адзначыў, што гэты, калі яго можна так назваць, машынабудаўнічы гандаль цяпер з'яўляецца дамінуючым у нашых адносінах. Прыклады БЕЛАЗа, паставак нашых трактароў, кормаўборачных камбайнаў, асобных адзінак тэхнікі "АМКАДОР" з'яўляюцца галоўнымі ў нашых гандлёвых адносінах. Але для таго каб перайсці на наступны ўзровень, мы павінны пашыраць інвестыцыйныя каналы. Пакуль, на жаль, вынікі тут недастатковыя, мы знаходзімся ў самым пачатку шляху, і тыя зборачныя вытворчасці, якія створаны ў апошнія два гады, павінны даць дадатковы эфект", - расказаў Дзмітрый Крутой журналістам па выніках сустрэчы.
Пасол адзначыў, што для Беларусі адкрываюцца добрыя магчымасці ў пастаўках ліфтавай тэхнікі, таму што ў Краснаярскім краі будзе рэалізавана вялікая праграма рэнавацыі. "Губернатар анансаваў прынятую на ўзроўні рэгіёна пяцігадовую праграму падрыхтоўкі святкавання 400-годдзя Краснаярска ў 2028 годзе: выдзелены велізарныя грошы федэральнага і рэгіянальнага ўзроўню", - паведаміў Дзмітрый Крутой. Гэта адкрывае новыя магчымасці ўдзелу беларускага боку ў рэнавацыі жылля, пастаўках абсалютна ўсіх відаў пасажырскай тэхнікі, праектах па будаўніцтве падземнага і наземнага метро. "Калі мы, беларусы, будзем тут непаваротлівымі і ўпусцім такія магчымасці - фактычна заняць гэту нішу будзе ўжо немагчыма. Гэта вялікая наша перавага - такое стаўленне кіраўніцтва Краснаярскага края да нашых вытворцаў, запрашэнне ўдзельнічаць актыўна ў гэтых праграмах - вялікі плюс для нас. І тут усё залежыць па вялікім рахунку ад нашай прадпрымальнасці на гэтым рынку", - падкрэсліў пасол.
"Добрыя прыклады ёсць ужо цяпер. Напрыклад, у сектары горназдабыўной прамысловасці. Вядомая кампанія сусветнага ўзроўню «Нарнікель» пачала супрацоўнічаць з Мінскім падшыпнікавым заводам у тым ліку па пастаўках новай прадукцыі, якая будзе вырабляцца на мінскім прадпрыемстве ў рамках вялікай дамоўленасці нашых прэзідэнтаў па імпартазамяшчэнні. Наша салігорскае прадпрыемства "Ніва-Холдынг" пачало пастаўляць шахтавы транспарт і адпаведнае горнае абсталяванне для золатаздабыўных прадпрыемстваў рэгіёна. "АМКАДОР" пачынае на базе шасі "Урала" вырабляць снегаачышчальную тэхніку", - пералічыў ён.
"І такіх прыкладаў павінна быць больш", - падкрэсліў Дзмітрый Крутой.
Пасол запрасіў губернатара наведаць з візітам Беларусь. "Губернатар запрасіў беларускіх будаўнікоў да рэалізацыі праекта краснаярскага метро. На добразычлівасць атмасферы сустрэчы паўплывала і тое, што Дзмітрый Крутой і Аляксандр Ус - землякі. Бацька краснаярскага губернатара родам з-пад Бялыніч", - дадалі ў прэс-службе.
Таксама Дзмітрый Крутой прыняў удзел у пленарным пасяджэнні Краснаярскага эканамічнага форуму. У кулуарах пасяджэння адбыліся сустрэчы пасла з губернатарам Кемераўскай вобласці Сяргеем Цывілевым, кіраўніком Рэспублікі Тыва Уладзіславам Хавалыгам і губернатарам Томскай вобласці Уладзімірам Мазурам.
Акрамя таго, у час візіту пасол наведаў шэраг прадпрыемстваў Краснаярскага края, зацікаўленых у супрацоўніцтве з Беларуссю.-0-
