10 лютага, Мінск /Кар. БЕЛТА/. ААТ "Краснасельскбудматэрыялы" ў 2020 годзе на Br4,2 млн знізіла затраты пры вытворчасці прадукцыі, паведамляе БЕЛТА са спасылкай на сайт холдынга "Беларуская цэментная кампанія" (БЦК).
"Над зніжэннем сабекошту прадукцыі наша прадпрыемства працуе сістэмна па праграме скарачэння затрат пры вытворчасці. Так, па выніках 2020 года эканамічны эфект склаў Br4,2 млн", - гаворыцца ў паведамленні.
Як растлумачылі ў кампаніі, размова аб цэлым комплексе мер. "Пры вытворчасці цэменту, напрыклад, мы пачалі выкарыстоўваць высокаалюмінатную гліну ўласнага радовішча, што дало магчымасць замясціць імпартную сумесь. Павялічана прымяненне вугальнага паліва пры абпале вапны, доля выкарыстання якога дасягнула 85 працэнтаў у структуры паліўнага балансу. Аптымізавана выкарыстанне сыравінных кампанентаў пры вытворчасці блокаў з ячэістага бетону, гэта дазволіла знізіць іх сабекошт шляхам змяншэння норм расходу цэменту, вапны і цеплавой энергіі", - адзначылі ў БЦК.
Акрамя таго, у філіяле нумар 1 "Цэментны завод" пры напрацоўцы сыравіннай мукі для вытворчасці цэменту добры эканамічны эфект быў дасягнуты дзякуючы адмове ад такога звяна, як элеватар вяртання крупкі. У выніку прадпрыемства сэканоміла на спажыванні электраэнергіі і рамонце.
"Краснасельскбудматэрыялы" - буйнейшы вытворца будаўнічых матэрыялаў у Беларусі. Гэта сучаснае шматпрофільнае прадпрыемства, якое выпускае прадукцыю ў асноўным з уласнай сыравіны: цэмент, будаўнічую вапну, дробнагрануляваны мел, блокі з ячэістага бетону і сухія будаўнічыя сумесі. Пастаяннымі спажыўцамі прадукцыі з'яўляюцца вядомыя будаўнічыя карпарацыі і фірмы Польшчы, Літвы, Латвіі, Эстоніі, Расіі, Украіны і Малдовы. У склад акцыянернага таварыства ўваходзяць шэсць філіялаў.-0-
