21 сакавіка, Масква /Эдуард Півавар - БЕЛТА/. Краінам Еўразійскага эканамічнага саюза неабходна максімальна гарманізаваць заканадаўства па абароне рынку ад небяспечнай прадукцыі. Аб гэтым заявіў член Калегіі (міністр) па тэхнічным рэгуляванні Еўразійскай эканамічнай камісіі (ЕЭК) Віктар Назаранка на нарадзе з кіраўнікамі органаў дзяржаўнага кантролю (нагляду) у сферы тэхнічнага рэгулявання краін ЕАЭС.
"Адна з ключавых задач Еўразійскай эканамічнай камісіі - стварэнне эфектыўнай сістэмы абароны ўнутранага рынку саюза ад небяспечнай прадукцыі, - падкрэсліў Віктар Назаранка. - Гэтаму павінен садзейнічаць пастаянны і канструктыўны дыялог кіраўнікоў органаў дзяржкантролю. Такі дыялог вельмі важны для ўдасканалення адзінай сістэмы тэхнічнага рэгулявання ў цэлым".
На нарадзе былі закрануты пытанні, звязаныя з парушэннямі норм саюзных тэхрэгламентаў, нядобрасумленнай ацэнкай адпаведнасці, змешваннем нацыянальнымі органамі дзяржаўнага кантролю (нагляду) розных яго відаў прымяняльна да адных і тых жа патрабаванняў саюза. У сувязі з гэтым міністр ЕЭК адзначыў, што неабходна павысіць эфектыўнасць нагляднай практыкі па рэалізацыі тэхнічных рэгламентаў ЕАЭС, гарманізаваць заканадаўства дзяржаў - членаў ЕАЭС адносна адказнасці за невыкананне адзіных норм. Удзельнікі сустрэчы абмеркавалі таксама канцэптуальныя напрамкі развіцця сістэмы дзяржаўнага кантролю, уключаючы ўдасканаленне механізмаў узаемадзеяння ўпаўнаважаных органаў у сферы тэхнічнага рэгулявання і санітарных і фітасанітарных мер.
"Акрамя пытанняў стварэння эфектыўнай сістэмы дзяржаўнага кантролю (нагляду), удзельнікі нарады абмеркавалі неабходнасць выбудоўвання празрыстай і строгай сістэмы адказнасці за выпуск у абарачэнне на адзіным рынку саюза небяспечнай прадукцыі, - адзначылі ў ЕЭК. - Прычым гэта павінна датычыцца ўсіх удзельнікаў рынку: ад вытворцаў і іх упаўнаважаных асоб, імпарцёраў і прадаўцоў да органаў па ацэнцы адпаведнасці з іх адказнасцю за абгрунтаванасць выдадзеных дакументаў аб адпаведнасці прадукцыі".
Была таксама разгледжана рэалізацыя пілотнага праекта па фарміраванні сістэмы інфармавання аб прадукцыі, якая не адпавядае патрабаванням тэхнічных рэгламентаў, у мэтах выканання даручэння Еўразійскага міжурадавага савета. "Саюзная сістэма інфармавання аб прадукцыі, якая не адпавядае патрабаванням тэхнічных рэгламентаў, павінна стаць асноўным інструментам нацыянальных органаў дзяржкантролю і камісіі па папярэджанні абарачэння на рынку саюза небяспечнай прадукцыі, - падкрэслілі ў ЕЭК. - Гэта сістэма дасць магчымасць спажыўцам, вытворцам і органам дзяржкантролю знаёміцца з інфармацыяй аб небяспечнай прадукцыі, аб выпадках продажу тавараў, што падлягаюць абавязковай ацэнцы адпаведнасці патрабаванням тэхнічных рэгламентаў саюза, без дакументаў аб такой ацэнцы, а таксама аб прынятых мерах органаў дзяржкантролю адносна такой прадукцыі. Прадугледжваецца, што пры выяўленні небяспечнай прадукцыі, якая не адпавядае патрабаванням адзіных тэхнічных рэгламентаў, органы дзяржкантролю будуць прымаць адпаведныя меры, у тым ліку выключэнне з абарачэння на ўсёй саюзнай тэрыторыі".-0-
