14 лютага, Мінск /Кар. БЕЛТА/. На нарадзе па пытаннях развіцця айчыннай мікраэлектронікі, якую Прэзідэнт Беларусі Аляксандр Лукашэнка правёў у час наведвання ААТ "ІНТЭГРАЛ", прыняты рашэнні па развіцці мікраэлектронікі да 2040 года. Аб гэтым заявіў журналістам міністр прамысловасці Аляксандр Яфімаў, перадае карэспандэнт БЕЛТА.
"Улічваючы, што мікраэлектронная прамысловасць нашай краіны - гэта даволі важны і адчувальны сегмент эканомікі і машынабудаўнічага комплексу ў цэлым, гэтаму пытанню ўдзелена вялікая ўвага. Ключавымі задачамі па выніках нарады стала паскарэнне працэсаў па дасягненні новых праектных узроўняў у галіне мікраэлектронікі. Лакалізацыя, імпартазамяшчэнне - гэта таксама два ключавыя пытанні для забеспячэння поўнага суверэнітэту Беларусі і Расіі ў галіне мікраэлектроннай прамысловасці", - сказаў міністр.
Ён адзначыў, што на сённяшні дзень урадам зацверджана праграма развіцця мікраэлектроннай галіны да 2030 года. "Але разам з тым на сённяшняй нарадзе мы разгледзелі пытанне значна глыбей і прынялі пэўныя рашэнні па развіцці гэтага напрамку аж да 2040 года. Улічваючы навукаёмістасць галіны, тыя ключавыя рашэнні, якія былі прыняты сёння, дадуць магчымасць актыўна развівацца не толькі ў бліжэйшую пяцігодку, але і ў наступнае дзесяцігоддзе", - заявіў Аляксандр Яфімаў.
Ён падкрэсліў, што існуючыя ў галіне дасягненні даюць магчымасць істотна нарошчваць аб'ёмы вытворчасці. Але пастаўлена задача паглядзець, як можна ў гэтай частцы дабавіць. "Нягледзячы на тое, што мы маем 14 экспартных рынкаў збыту для нашай мікраэлектроннай прамысловасці, геаграфію паставак таксама будзем пераглядаць у бок павелічэння. І па аб'ёме вытворчасці, і па колькасці краін, якія будуць спажываць прадукцыю нашай мікраэлектроннай прамысловасці", - расказаў міністр.
Аляксандр Яфімаў адзначыў, што праграмай развіцця мікраэлектроннай прамысловасці Беларусі прадугледжана рэалізацыя сямі інвестыцыйных праектаў. "Усе праекты ідуць з апярэджаннем па тэрмінах. Аб'ём фінансавання перасягае Br1 млрд. Разам з тым, мы разгледзелі пытанне рэалізацыі як мінімум яшчэ пяці новых інвестпраектаў у галіне мікраэлектроннай прамысловасці. Аб'ём рэсурсаў таксама вызначаны - гэта яшчэ некалькі соцень мільёнаў беларускіх рублёў. Сродкі будуць адшуканы, напрамкі вызначаны. Гэта станоўчы старт рэалізацыі цалкам новых для мікраэлектроннай прамысловасці праектаў", - сказаў кіраўнік Мінпрама.
Што датычыцца канкурэнцыі ў сферы мікраэлектронікі, Аляксандр Яфімаў растлумачыў, што тут кожны вытворца канкурыруе ў сваёй нішы. Беларусь у гэтым плане даволі ўпэўнена сябе адчувае ў сваёй нішы і мае намер пашыраць наменклатуру і асартымент прадукцыі. "Наша прадукцыя даволі сучасная, адпавядае ўсім высокім патрабаванням, забяспечвае бяспеку эксплуатацыі ў тых галінах, дзе яна прымяняецца. Таму мы пазітыўна глядзім на рынкі збыту і іх захаванне. Мы даволі канкурэнтаздольныя", - упэўнены міністр.
Ён таксама звярнуў увагу на тэму стварэння сучасных сродкаў вытворчасці для мікраэлектроннай прамысловасці. "Мы актыўна развіваем і гэты напрамак. Там таксама ідзе рэалізацыя мноства інвестыцыйных праектаў, якія дадуць магчымасць нам атрымаць даволі высокія вынікі ў частцы прынцыпова новых праектных норм атрымання інтэгральных мікрасхем. Вядома ж, гэта пытанне мы разглядаем у комплексе", - заявіў Аляксандр Яфімаў.-0-
Падпісвайцеся на нас у
