13 снежня, Мінск /Уладзімір Мацвееў - БЕЛТА/. Карэлія зацікаўлена ў развіцці супрацоўніцтва з Беларуссю па шырокім спектры напрамкаў. Аб гэтым сёння на сустрэчы з Прэзідэнтам Беларусі Аляксандрам Лукашэнкам заявіў кіраўнік Рэспублікі Карэлія Расійскай Федэрацыі Артур Парфенчыкаў, перадае карэспандэнт БЕЛТА.
На сустрэчы кіраўнік беларускай дзяржавы адзначыў шэраг перспектыўных напрамкаў для пашырэння ўзаемадзеяння з Карэліяй. У іх ліку вытворчая кааперацыя, пастаўкі рознай тэхнікі, прадуктаў харчавання, абмен вопытам і тэхналогіямі ў АПК, у тым ліку ў малочнай жывёлагадоўлі і рыбаводстве. "Усё, аб чым гаварылі, уяўляе наш вялікі ўзаемны інтарэс. Думаю, што мы ў любым выпадку павінны знаходзіць узаемавыгадны вынік. У нас толькі такі падыход", - сказаў Артур Парфенчыкаў.
Паводле яго слоў, у ходзе візіту дэлегацыі гэтага расійскага рэгіёна ў Беларусь быў складзены новы план трохгадовага ўзаемадзеяння, які разлічаны на павелічэнне аб'ёмаў супрацоўніцтва як у гандлі, так і па іншых напрамках.
У машынабудаванні ў якасці пілотнага і якарнага сумеснага праекта Артур Парфенчыкаў назваў стварэнне лесанарыхтоўчай тэхнікі "Амкадор". "Мы прынялі ўжо на заканадаўчым узроўні ў рэспубліцы ўсе магчымыя меры падтрымкі гэтаму прадпрыемству. Гэты праект будзе садзейнічаць развіццю прамысловасці ў Беларусі. Мы, безумоўна, разам зможам выйсці на большыя аб'ёмы, прычым у асваенні не толькі расійскага рынку. У нас вельмі амбіцыйныя планы і адносна знешняга рынку", - падкрэсліў кіраўнік Карэліі.
Бакам таксама цікавы абмен вопытам у лясной гаспадарцы ў цэлым - пытаннях інтэнсіўнага лесакарыстання, лесааднаўлення, далейшай глыбокай перапрацоўкі драўніны.
У размове з журналістамі пасля сустрэчы з Прэзідэнтам Беларусі Артур Парфенчыкаў расказаў, што паміж бакамі ёсць як добрыя напрацоўкі, так і перспектыўныя напрамкі супрацоўніцтва. Напрыклад, у сталіцы Карэліі - горадзе Петразаводску вырабляецца частка абсталявання для будаўніцтва БелАЭС. Ёсць інтарэс да ўзаемадзеяння ў галіне робататэхнікі, суднабудавання.
Гэта таксама сферы сельскай гаспадаркі, рыбаводства. Карэлія з'яўляецца бясспрэчным лідарам у Расіі па вытворчасці азёрнай фарэлі. "Мы дамовіліся, што ў бліжэйшы час гэта прадукцыя з'явіцца ў Беларусі. У нас сур'ёзныя планы па сумесным развіцці гэтых галін і ў Беларусі, і ў Карэліі. Мы дамовіліся абменьвацца дасягненнямі ў навуцы - у вытворчасці кармоў, генетыцы", - дадаў Артур Парфенчыкаў.
Карэльскі бок таксама вельмі зацікавілі магчымасці выкарыстання прадукцыі беларускага машынабудавання ў сферы грамадскага транспарту. "З задавальненнем учора паглядзелі апошнія напрацоўкі і па гібрыдах, і па электробусах. Я хацеў бы, каб у кароткі час беларуская тэхніка з'явілася на карэльскіх дарогах. У гэтым напрамку мы таксама будзем працаваць", - адзначыў кіраўнік рэгіёна.
Ён падкрэсліў, што супрацоўніцтва паміж Карэліяй і Беларуссю ахоплівае не толькі гандлёва-эканамічныя пытанні, але і галіны культуры, гуманітарных сувязей. Гэта абумоўлена тым, што ў Карэліі пражывае вельмі вялікая беларуская дыяспара, створана нацыянальна-культурная аўтаномія, ды і сам кіраўнік Карэліі мае беларускія карані. "Вельмі важна, вядома, і мы абмяркоўвалі гэта сёння з Прэзідэнтам Беларусі, каб з'явіўся прамы рэйс Мінск-Петразаводск. У нас жыхары вельмі хочуць, каб такая сувязь з'явілася. Гэта будзе садзейнічаць актыўнасці і бізнесу, і развіццю турызму", - сказаў Артур Парфенчыкаў.-0-
