19 верасня, Мінск /Кар. БЕЛТА/. Галоўнымі драйверамі паскарэння ВУП сталі прамысловасць, будаўніцтва і гандаль. Аб гэтым заявіў журналістам намеснік міністра эканомікі Андрэй Картун, каменціруючы вынікі работы эканомікі ў студзені - жніўні 2023 года, перадае карэспандэнт БЕЛТА.
"У студзені - жніўні тэмпы росту ВУП паскорыліся да 103,1 працэнта. Гэта плюс 0,2 працэнтнага пункта да сямі месяцаў. Традыцыйна галоўнымі драйверамі паскарэння ВУП сталі прамысловасць, будаўніцтва і гандаль", - сказаў Андрэй Картун.
Паводле яго слоў, у прамысловай вытворчасці тэмпы росту паскорыліся да 107,9 працэнта. "Тут прыбавілі галоўным чынам за кошт машына- і прыборабудавання, нафтаперапрацоўчай і хімічнай галін. Высокія тэмпы росту захоўваюцца таксама ў металургіі, вытворчасці бытавой тэхнікі, харчовай і лёгкай прамысловасці", - расказаў ён.
Намеснік міністра адзначыў, што будаўніцтва з кожным месяцам набірае абароты. "Сукупная дабаўленая вартасць будаўніцтва складае 104,5 працэнта. У асноўным прыбаўляюць будаўніча-мантажныя і падрадныя работы, паскорыліся тэмпы будаўніцтва жылля. Рэалізуюцца інвестыцыйныя праекты, у тым ліку ў рамках мадэрнізацыі дзеючых прадпрыемстваў", - паведаміў Андрэй Картун.
Аднаўленчая дынаміка захоўваецца ў транспартнай дзейнасці, ІТ-галіне.
"Таксама актыўна аднаўляецца дрэваапрацоўка. Прадпрыемствы змаглі адаптавацца і знайсці новыя рынкі збыту", - дадаў намеснік кіраўніка эканамічнага ведамства.-0-
