22 ліпеня, Мінск /Кар. БЕЛТА/. Амаль 2 тыс. куб.м беларускіх піламатэрыялаў адправяць 24 ліпеня кантэйнерным поездам у Кітай, паведамілі карэспандэнту БЕЛТА ў РУП "Белмытнясэрвіс".
"Поезд пераадолее больш за 7 тыс. км за 14 дзён. "Чыгуначны транспарт - адзін з самых эканамічных, надзейных і дакладных спосабаў дастаўкі грузаў, універсальны пры перавозцы вялікіх аб'ёмаў тавару на значныя адлегласці. Гэтым і тлумачацца яго высокія рыначныя паказчыкі. Асноўная перавага кантэйнерных чыгуначных перавозак - адсутнасць дадатковых перагрузак", - сказалі ў "Белмытнясэрвісе".
Прадпрыемства з 2016 года актыўна развівае праекты па ініцыятыве "Пояс і шлях" па перавозцы грузаў чыгуначным транспартам у складзе арганізаваных кантэйнерных паяздоў, з'яўляючыся адначасова грузаатрымальнікам/грузаадпраўшчыкам, суаператарам і экспедытарам. За першае паўгоддзе "Белмытнясэрвіс" адправіў у КНР транзітам праз Расію, Казахстан, Манголію дзевяць кантэйнерных паяздоў (каля 500 кантэйнераў). Агульны аб'ём пастаўленай прадукцыі - 12 тыс. т. Час у дарозе да пункта назначэння складае 14-16 дзён. Месцы дастаўкі грузаў у Кітаі - Тайюань, Чанша, Чысуму. У перспектыве плануецца павялічыць частату адправак кантэйнерных паяздоў да чатырох разоў у месяц.
Як адзначылі на прадпрыемстве, мытныя органы і арганізацыі пастаянна працуюць над спрашчэннем працэдур у галіне міжнародных перавозак па напрамку Кітай - Беларусь - Кітай з улікам стратэгічнага супрацоўніцтва дзвюх краін. "Пры адпраўленні паяздоў "Белмытнясэрвіс" аказвае поўны комплекс лагістычных паслуг, уключаючы кансалідацыю тавару з любога кутка Беларусі на ўласных тэрміналах, прыняцце заявак на перавозку, захоўванне і фітасанітарны кантроль, прадастаўленне рухомага саставу, мытнае афармленне неабходных транспартных і іншых дакументаў, апламбоўванне, транспартна-экспедыцыйнае абслугоўванне на ўсім шляху, мытнае дэклараванне і інш. Усё гэта ажыццяўляецца за адзін дзень", - адзначылі на прадпрыемстве.-0-
