6 снежня, Мінск /Кар. БЕЛТА/. СЗАТ "Кампанія па развіцці індустрыяльнага парка" паспяхова прайшло наглядны аўдыт і пацвердзіла міжнародныя сертыфікаты EMAS і OHSAS. Аб гэтым паведаміў карэспандэнту БЕЛТА першы намеснік генеральнага дырэктара СЗАТ Кірыл Карацееў.
Гэтыя сертыфікацыі лічацца ў свеце найбольш перадавымі сістэмамі пацвярджэння стандартаў менеджменту ў адпаведнасці з прынцыпамі ўстойлівага развіцця. Міжнародныя сертыфікаты якасці або адпаведнасці выдаюцца прадпрыемствам і арганізацыям, якія хочуць пацвердзіць адпаведнасць іх прадукцыі, паслуг, арганізацыі вытворчасці або менеджменту еўрапейскім і сусветным стандартам. EMAS сведчыць аб захаванні экалагічных стандартаў, а OHSAS - стандартаў прамысловай бяспекі і аховы працы.
Паводле слоў Кірыла Карацеева, выкананне гэтых крытэрыяў дало магчымасць кампаніі кіраваць рызыкамі ў сістэме менеджменту і павышаць эфектыўнасць яе функцыянавання.
Першы намеснік гендырэктара кампаніі нагадаў, што сертыфікат EMAS Еўрапейскага саюза Кітайска-беларускі індустрыяльны парк атрымаў першым у Беларусі. "Пацвярджаць сертыфікаты неабходна штогод. Пры гэтым патрабаванні з кожным годам усё ўзрастаюць", - падкрэсліў ён.-0-
