ДЗЯРЖОРГАНЫДЗЯРЖОРГАНЫ
Флаг Аўторак, 5 ліпеня 2022
Мінск Ясна +19°C
Усе навіны
Усе навіны
Эканоміка
18 мая 2022, 12:11

Калаур: ID-карткі і біяметрычныя дакументы плануецца ўкараніць у банкаўскую практыку

Фота з архіва
Фота з архіва

18 мая, Мінск /Кар. БЕЛТА/. Старшыня праўлення Нацыянальнага банка Беларусі Павел Калаур у час адкрыцця міжнароднага лічбавага форуму #GBC (Дзяржава. Бізнес. Грамадзяне) заявіў, што ID-карткі і біяметрычныя дакументы плануецца ўкараніць у банкаўскую практыку Беларусі, перадае карэспандэнт БЕЛТА.

"Умацаванне супрацоўніцтва і пошук новых тэхналагічных рашэнняў для тых задач, якія стаяць перад нашай краінай і ўсімі дзяржавамі - удзельніцамі ЕАЭС, вызначаюць значнасць і актуальнасць тэм форуму #GBC. Павышэнне эфектыўнасці ўзаемадзеяння дзяржавы, бізнесу і грамадзян заўсёды была адной з задач як Нацбанка, так і ААЦ. Нашы арганізацыі звязвае шматгадовае плённае супрацоўніцтва. Пры гэтым выкананне важных для дзяржавы рашэнняў было эфектыўным і нацэленым на вынік", - расказаў у час адкрыцця форуму #GBC Павел Калаур.

Ён нагадаў, што Нацыянальны банк Беларусі стаў першым органам дзяржаўнага кіравання, дзе былі ўкаранёны электронныя дакументаабарот, дакумент і лічбавы подпіс. "У цесным супрацоўніцтве дзяржаўных органаў нашай краіны ствараўся і перспектыўны праект па стварэнні ID-картак і прымяненні пры аказанні электронных паслуг. Цяпер у мэтах выканання заканадаўства вядзецца работа па ўкараненні ў банкаўскую практыку выкарыстання гэтых картак, іх рэквізітаў і іншых біяметрычных дакументаў", - адзначыў кіраўнік Нацбанка.

Павел Калаур лічыць, што сацыяльна-эканамічнае развіццё Беларусі цесна звязана з лічбавізацыяй усіх сфер жыцця і развіццём знешнегандлёвых адносін. А лічбавізацыя ў сваю чаргу звязана з бяспекай і абаронай інфармацыі.

Старшыня праўлення Нацбанка таксама расказаў гасцям форуму аб ходзе рэалізацыі саюзнай інтэграцыі ў банкаўскай сферы. "Як у рамках Саюзнай дзяржавы, так і ў рамках Еўразійскага эканамічнага саюза ў нас ёсць магчымасць ажыццяўляць банкаўскую дзейнасць па аддаленым прадастаўленні паслуг, правядзенні трансгранічных плацяжоў і перадачы фінансавай інфармацыі, - канстатаваў кіраўнік Нацбанка. - У рамках рэалізацыі дарожных карт забяспечана інтэграцыя плацежных сістэм на аснове банкаўскіх плацежных картак, сістэмы перадачы фінансавай інфармацыі Нацбанка Беларусі і сістэмы перадачы фінансавых паведамленняў Банка Расіі. У высокай стадыі гатоўнасці знаходзіцца інтэграцыя сістэм імгненных плацяжоў Беларусі і Расіі. Вядзецца актыўная сумесная работа над заканадаўчым замацаваннем магчымасці ажыццяўлення аддаленых трансгранічных ідэнтыфікацый кліентаў банка і абмен інфармацыяй аб махлярскіх схемах".

"Дасягненні дзяржавы і бізнесу для грамадзян" - пад такім слоганам сёння ў Нацыянальнай бібліятэцы Беларусі стартаваў ІІ Міжнародны лічбавы форум #GBC (Дзяржава. Бізнес. Грамадзяне). Мэта мерапрыемства - стварэнне дыялогавых пляцовак для ўмацавання супрацоўніцтва і пошуку новых рашэнняў, якія змогуць павысіць эфектыўнасць узаемадзеяння дзяржавы, бізнесу і грамадзян, а таксама прэзентацыі дасягненняў Беларусі ў сферы лічбавай трансфармацыі.

У рабоце форуму прымаюць удзел кіраўнікі дзяржаўных органаў і арганізацый, прадстаўнікі IT-кампаній, банкаў, бізнесу, а таксама сацыяльнай сферы. Форум праводзіцца пад эгідай незалежнага рэгулятара ў сферы інфармацыйна-камунікацыйных тэхналогій, функцыі якога ажыццяўляе Аператыўна-аналітычны цэнтр пры Прэзідэнце Рэспублікі Беларусь. Арганізатарам мерапрыемства выступае Нацыянальны цэнтр абмену трафікам пры падтрымцы Нацыянальнага цэнтра электронных паслуг і Беларускіх воблачных тэхналогій.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі