22 верасня, Мінск /Кар. БЕЛТА/. Беларуская прадукцыя вядомая і карыстаецца попытам на ўсіх рынках, заявіў журналістам намеснік міністра эканомікі Дзмітрый Ярашэвіч на палях міжнароднага экспертнага семінара "Актуальныя пытанні забеспячэння нацыянальнага "павароту ў Азію", перадае карэспандэнт БЕЛТА.
"Безумоўна, рынкі краін далёкай дугі - Паўднёва-Усходняй Азіі, Ціхаакіянскага рэгіёна, Афрыкі - цяпер адны з самых перспектыўных. Хуткарослыя эканомікі гэтых краін (у наступным годзе чакаецца рост звыш 6 працэнтаў па асобных рэгіёнах) ствараюць усе перадумовы, каб мы нарошчвалі сваю прысутнасць на іх. Таму што рост эканомікі звязаны з ростам імпарту гэтых краін, а для нас гэта магчымасці экспарту", - сказаў Дзмітрый Ярашэвіч.
Паводле яго слоў, беларускую прадукцыю на гэтых рынках добра ведаюць і яна мае знак якасці. "У нас ёсць даныя па 7 месяцах - дадатнае сальда вышэй за $2 млрд па таварах і паслугах. Гэта сведчыць, што наша прадукцыя вядомая, карыстаецца попытам на ўсіх рынках. Гэта першая прычына - тое, што мы можам вырабляць прадукцыю, у якой маюць патрэбу і якая патрабуецца на гэтых рынках. А па-другое, безумоўна, Беларусь - надзейны партнёр. Беларусь традыцыйна як знак якасці. Гэта значыць, мы ўсе свае абавязацельствы заўсёды выконваем у поўным аб'ёме", - адзначыў намеснік міністра.
Дзмітрый Ярашэвіч падкрэсліў, што Беларусь, робячы паварот у Азію, захоўвае шматвектарнасць. "Тыя рынкі, на якіх нас чакаюць, з якімі мы працуем, мы не плануем адтуль выходзіць. Мы, зразумела, будзем працаваць з усімі партнёрамі, якія самі гатовы з намі працаваць", - дадаў ён.
Беларускі інстытут стратэгічных даследаванняў сёння праводзіць міжнародны экспертны семінар-дыскусію на тэму "павароту ў Азію". У мерапрыемстве, якое праходзіць у гібрыдным фармаце, прымаюць удзел вядучыя эксперты МЗС, Мінэканомікі, Нацыянальнага цэнтра маркетынгу і кан'юнктуры цэн, БелГПП, Банка развіцця, Агенцтва знешнеэканамічнай дзейнасці, Рэспубліканскай канфедэрацыі прадпрымальніцтва, БДУ, БДЭУ, Акадэміі кіравання пры Прэзідэнце Рэспублікі Беларусь. Прадугледжаны таксама выступленні замежных экспертаў. Падведамнымі прадпрыемствамі масава прадстаўлена Міністэрства прамысловасці.
Мэта мерапрыемства - "зверка гадзіннікаў" і крытычная інвентарызацыя на ўзроўні зацікаўленых бягучага стану спраў на азіяцкім вектары, ідэнтыфікацыя праблем, вызначэнне шляхоў і інструментаў іх вырашэння на бліжэйшую і сярэднетэрміновую перспектыву. Доўгатэрміновая мэта - стварэнне на платформе БІСД пастаянна дзеючага інтэлектуальнага клуба (пляцоўкі) для экспертнага забеспячэння пашырэння нацыянальных інтарэсаў у мэтавых краінах, у тым ліку на ўзроўні носьбітаў бізнес-інтарэсаў. У стратэгічным плане плануецца забяспечыць сінхранізацыю вопыту і намаганняў дзяржаўных кіраўнікоў, бізнесу (прадпрымальнікаў), сектара адукацыі і экспертнай супольнасці на аснове сінергіі іх кумулятыўных кампетэнцый і ведаў.-0-
