Як у ЕАЭС змагаюцца з парушальнікамі правіл канкурэнцыі ў гандлі, расказаў Ермаловіч

26 ліпеня, Мінск /Кар. БЕЛТА/. Член Калегіі (міністр) па канкурэнцыі і антыманапольным рэгуляванні Еўразійскай эканамічнай камісіі Максім Ермаловіч расказаў, як у ЕАЭС змагаюцца з парушальнікамі правіл канкурэнцыі ў гандлі. На гэту тэму ён размаўляў з журналістамі перад пачаткам урачыстага мерапрыемства, прымеркаванага да 100-годдзя ўтварэння органаў гандлю Беларусі, перадае карэспандэнт БЕЛТА.

"Асноўная задача ЕЭК у галіне антыманапольнага рэгулявання заключаецца ў тым, каб забяспечыць выкананне агульных правіл канкурэнцыі на рынку ЕАЭС і спыняць парушэнні ў выпадку, калі ўдзельнікамі гандлю з'яўляюцца прадпрыемствы з розных краін, гэта значыць пастаўкі ажыццяўляюцца на трансгранічным рынку. Гэту работу мы праводзім пастаянна, у нас ёсць цэлы набор інструментаў. Антыманапольная служба ЕЭК - інстытут прамога дзеяння. Гэта дазваляе праводзіць расследаванні, спыняць парушэнні, прыцягваць парушальнікаў да адказнасці, накладаць на іх штрафы. Гэта дае свае вынікі - колькасць такіх парушэнняў, колькасць заяў штогод скарачаецца", - сказаў Максім Ермаловіч.

Паводле яго слоў, не ўсе заявы аб парушэнні правіл канкурэнцыі, якія паступаюць у ЕЭК, адпавядаюць кампетэнцыі камісіі. Частка перадаецца ў нацыянальныя органы для выканання. "Але штогод праводзіцца каля 20 расследаванняў, якія завяршаюцца прыцягненнем да адказнасці вінаватых", - удакладніў міністр ЕЭК.

Актыўна праводзіцца і прафілактыка парушэнняў у галіне антыманапольнага заканадаўства і канкурэнцыі. "Мы праводзім сустрэчы з бізнес-коламі, працуе такі інстытут, як грамадская прыёмная. У рамках гэтай грамадскай прыёмнай мы сустракаемся з прадстаўнікамі бізнесу і адказваем на ўсе пытанні, звязаныя з правам саюза, з яго належным выкананнем, расказваем, як звярнуцца ў камісію з заявай, каб парушальнік быў прыцягнуты да адказнасці", - адзначыў Максім Ермаловіч.-0-