17 красавіка, Мінск /Кар. БЕЛТА/. Іпатэка будзе цікавай для любых катэгорый грамадзян і павысіць магчымасць купіць жыллё, заявіў сёння журналістам намеснік міністра эканомікі Юрый Чабатар, каменціруючы ўказ нумар 130 "Аб іпатэчным жыллёвым крэдытаванні", перадае карэспандэнт БЕЛТА.
"Іпатэка будзе цікавай для любых катэгорый грамадзян нараўне з іншымі механізмамі, якія сёння існуюць. Гэта павялічвае магчымасці нашых грамадзян. Патрэбнасць у іпатэцы расце, шмат зваротаў наконт гэтага. Думаю, многія пытанні грамадзян мы закрылі прыняццем гэтага ўказа", - адзначыў Юрый Чабатар.
Намеснік міністра звярнуў увагу, што ў краіне ёсць некалькі фінансавых інструментаў для падтрымкі будаўніцтва жылля, але адзін з найбольш распаўсюджаных ва ўсім свеце, іпатэчнае крэдытаванне, у Беларусі не вельмі развіты. "Прыняцце ўказа з'яўляецца адным з крокаў, каб іпатэчнае крэдытаванне знайшло больш шырокае прымяненне як у банкаў, так і ў нашага насельніцтва. Сёння банкі ў прынцыпе крэдытуюць пад заклад жылля, але ёсць пытанні. Іх указ і ўрэгуляваў", - растлумачыў Юрый Чабатар.
Згодна з указам нумар 130, іпатэчнае крэдытаванне можа быць прыменена да жылля як на першасным, так і на другасным рынку, што, паводле слоў намесніка міністра, вельмі актуальна для грамадзян.
Ён расказаў, што ўказ укараняе механізмы, звязаныя з падтрымкай атрымальнікаў крэдытаў. "Напрыклад, дакумент устанаўлівае гранічныя тэрміны і гранічныя сумы, пры якіх банк можа звярнуцца за спагнаннем закладной кватэры. Вырашаны таксама асобныя пытанні адміністравання, перш за ўсё гэта датычыцца банкаўскай сферы, каб больш паскорана праходзіла рэгістрацыі дагавораў закладу і г.д.", - растлумачыў Юрый Чабатар.
Яшчэ адзін важны момант для развіцця іпатэчнага крэдытавання - указ укараняе такі механізм, як першараднасць і першачарговасць закладу кватэры ў параўнанні з усімі іншымі магчымымі прэтэнзіямі на гэту кватэру. "Гэта вельмі важна з пазіцыі таго, каб банкі былі перакананы, што з іх закладам нічога не здарыцца", - падкрэсліў намеснік міністра.
Як паведамлялася, указ нумар 130 "Аб іпатэчным жыллёвым крэдытаванні" падпісаны 16 красавіка. Прадметам іпатэкі можа выступаць толькі жыллё, зарэгістраванае ва ўстаноўленым парадку, у тым ліку набытае на другасным рынку жылой нерухомай маёмасці. Пры гэтым іпатэка будзе распаўсюджвацца таксама на зямельны ўчастак, на якім размешчана набываемае жыллё.
Згодна з дакументам, банк зможа накіраваць спагнанне на прадмет іпатэкі толькі пры адначасовым парушэнні дзвюх умоў крэдытнага дагавора: калі завінавачанасць па асноўнай суме доўгу перасягае 10 працэнтаў ад сумы прадастаўленага крэдыту, а таксама пратэрмінаваная завінавачанасць па асноўнай суме доўгу і працэнтах за карыстанне крэдытам складае больш за 90 дзён (у выпадку смерці крэдытаатрымальніка - больш за 9 месяцаў).
Грамадзяне, якія праходзяць тэрміновую ваенную (або альтэрнатыўную) службу, змогуць скарыстацца адтэрміноўкай пагашэння завінавачанасці па іпатэчным жыллёвым крэдыце і працэнтах за карыстанне ім на перыяд службы.
Банкам прадастаўлена першачарговае права на задавальненне нявыкананых абавязацельстваў па жыллёвым крэдыце за кошт прадмета іпатэкі. Патрабаванні іншых крэдытораў, забяспечаныя закладам гэтага жылля, будуць задавольвацца пасля поўнага пагашэння даўгоў банка. Гэтыя меры нацэлены на тое, каб стымуляваць банкі да выкарыстання іпатэкі як асноўнага спосабу забеспячэння выканання абавязацельстваў па жыллёвых крэдытах.
Акрамя таго, з прыняццем указа спрошчана рэгістрацыя закладу: банк самастойна накіроўвае неабходную інфармацыю ў тэрытарыяльныя арганізацыі па дзяржаўнай рэгістрацыі нерухомай маёмасці.-0-
