Сцяг Чацвер, 28 сакавіка 2024
Усе навіны
Усе навіны
Эканоміка
11 чэрвеня 2019, 11:52

Інвестыцыі ЕБРР у эканоміку Беларусі ў 2019 годзе могуць перасягнуць 360 млн еўра - Румас

11 чэрвеня, Лондан /Кар. БЕЛТА/. Аб'ём інвестыцый Еўрапейскага банка рэканструкцыі і развіцця ў эканоміку Беларусі ў 2019 годзе можа перасягнуць 360 млн еўра. Аб гэтым заявіў прэм'ер-міністр Беларусі Сяргей Румас сёння на сустрэчы з першым віцэ-прэзідэнтам ЕБРР Юргенам Рыгтэрынкам у Лондане, перадае карэспандэнт БЕЛТА.

"Мы зацікаўлены ў далейшым нарошчванні інвестыцый ЕБРР, прычым як у дзяржаўны, так і ў прыватны сектар. Мы ўчора абмяркоўвалі з Аланам Пію (віцэ-прэзідэнт ЕБРР. - Заўвага БЕЛТА), што мы павінны разам папрацаваць над тым, каб планку мінулага года перасягнуць. У нас ёсць усе магчымасці пры добрай, зладжанай рабоце перасягнуць аб'ём у памеры 360 млн еўра", - адзначыў Сяргей Румас.

Паводле слоў прэм'ер-міністра, Беларусь высока цэніць даверныя адносіны з ЕБРР. "Гатоўнасць бакоў да раўнапраўнага дыялогу стала залогам поспеху нашага ўзаемадзеяння", - лічыць ён.

Цяпер урад і Еўрапейскі банк рэканструкцыі і развіцця рыхтуюцца да падпісання шэрага новых пагадненняў у сферы транспарту, ЖКГ і энергаэфектыўнасці.

ЕБРР - шматбаковы банк, які садзейнічае развіццю прыватнага сектара і прадпрымальніцкай ініцыятывы ў 38 эканоміках на трох кантынентах. Акцыянерамі банка з'яўляюцца 67 краін, а таксама ЕС і Еўрапейскі інвестыцыйны банк.

Еўрапейскі банк рэканструкцыі і развіцця з'яўляецца найбуйнейшым інстытуцыянальным інвестарам у эканоміку Беларусі. З пачатку сваёй дзейнасці ў Беларусі ў 1992 годзе ЕБРР інвесціраваў амаль 2,46 млрд еўра ў 114 праектаў у розных галінах эканомікі краіны.-0-

Падпісвайцеся на нас у
Twitter
Топ-навіны
Свежыя навіны Беларусі