18 красавіка, Мінск /Кар. БЕЛТА/. Губернатар Ніжагародскай вобласці Глеб Нікіцін даў ацэнку беларуска-расійскаму трамваю ў час сустрэчы з прэм'ер-міністрам Беларусі Раманам Галоўчанкам, перадае карэспандэнт БЕЛТА.
"Чатыры трамваі ўжо курсіруюць па Ніжнім Ноўгарадзе. Горад вельмі ўзгорысты, з перападамі вышынь, і гэта асаблівы выклік для трамвайнага руху. Праводзіліся асобныя выпрабаванні пры гэтых перападах вышынь. І частка трамваяў ужо курсіруе ў гістарычным цэнтры, дзе якраз патрабуюцца пад'ёмы і спускі. Трамвай сябе зарэкамендаваў вельмі добра", - сказаў Глеб Нікіцін.
Паводле яго слоў, тыя, хто адказвае за рэформу грамадскага транспарту, ацанілі, што гэта было правільнае рашэнне. "Бачу, што і патэнцыяльныя пакупнікі цікавяцца, хочуць гэты трамвай у сваіх гарадах таксама бачыць", - адзначыў губернатар.
Як паведамлялася раней, у Ворсме Ніжагародскай вобласці 3 снежня 2022 года адкрыта сумеснае расійска-беларускае прадпрыемства па выпуску трамваяў. Старт новай вытворчасці далі пасол Беларусі ў Расіі Дзмітрый Крутой, міністр прамысловасці Беларусі Аляксандр Рагожнік, губернатар Ніжагародскай вобласці Глеб Нікіцін і намеснік міністра прамысловасці і гандлю Расіі Альберт Карымаў.
Сумеснае прадпрыемства "Ніжэкатранс", сузаснавальнікам якога з'яўляецца ААТ "ККХ "БКМ" (Беларусь), зарэгістравана ў верасні 2022 года. Яно створана для забеспячэння лакалізацыі вытворчасці трамвайных вагонаў для патрэб Ніжняга Ноўгарада ў адпаведнасці з дамоўленасцямі, дасягнутымі раней паміж урадам Ніжагародскай вобласці і ААТ "ККХ "БКМ".-0-
