17 красавіка, Мінск /Кацярына Марковіч - БЕЛТА/. Гандлёва-прамысловым палатам неабходна скаардынаваць узаемадзеянне бізнесу дзяржаў - членаў ЕАЭС. Такое меркаванне выказаў журналістам старшыня Беларускай ГПП Уладзімір Улаховіч перад пачаткам пасяджэння Кансультатыўнага савета палат дзяржаў - членаў ЕАЭС, якое праходзіла сёння ў БелГПП у рэжыме відэаканферэнцыі, перадае карэспандэнт БЕЛТА.
"Для развіцця нашай інтэграцыі і пераадолення тых праблем, з якімі мы сёння сутыкнуліся, вельмі важна скаардынаваць узаемадзеянне бізнесу нашых пяці дзяржаў. У кожнай з нашых краін вельмі высокая доля малога і сярэдняга прадпрымальніцтва, у тым ліку ў вытворчым сектары. І яны не павінны застацца за бортам нашай увагі, таму гандлёва-прамысловым палатам трэба выбудаваць каардынацыйную работу, давесці гэтыя праблемы да Еўразійскай эканамічнай камісіі, каб чарговы пакет мер быў прыкладным і максімальна эфектыўным", - падкрэсліў Уладзімір Улаховіч.
Паводле яго слоў, у кожнай краіне пэўныя меры прыняты ўжо, і цяпер ГПП неабходна абмяняцца найбольш паспяховымі практыкамі. На іх аснове будзе выбудавана агульная мадэль узаемадзеяння і каардынацыі. "Гэта датычыцца пытанняў зняцця абцяжарання, падатковай палітыкі і шэрага іншых пытанняў. У ГПП ёсць адна паслуга, якая, на жаль, цяпер аказалася запатрабаванай, - гэта агляд абставін неадольнай сілы. І мы ўжо дамовіліся з нашымі партнёрамі ў пяці дзяржавах на працягу аднаго дня вызначаць і выдаваць гэтыя пасведчанні. Гэтыя праблемы закранулі не толькі нашых экспарцёраў, але і імпарцёраў. Таму наша агульная каардынацыйная работа павінна забяспечваць максімальна хуткую юрыдычную падтрымку прадпрыемстваў", - адзначыў старшыня БелГПП.
Кіраўнік палаты падкрэсліў, што сёння важна захаваць напрацоўкі ў прамысловай кааперацыі, максімальна дапамагчы слабаабароненым сектарам эканомікі і бізнесу, такім як турызм, індустрыя гасціннасці. "Вынікам нашага пасяджэння павінен стаць падрыхтаваны пакет мер для ЕЭК, скаардынаваны з улікам магчымасцей, якія сёння ёсць у Еўразійскага банка развіцця. Толькі праз філасофію супрацоўніцтва мы сапраўды можам пераадолець разам усе складанасці", - лічыць Уладзімір Улаховіч.-0-
