2 верасня, Віцебск /Алеся Пушнякова - БЕЛТА/. ААТ "Глыбоцкі малочнакансервавы камбінат" за студзень-жнівень гэтага года паставіў у Кітай сыроваткі на $2 млн, і цяпер практычна ўвесь аб'ём такой сыравіны ідзе на названы экспартны рынак. Аб гэтым карэспандэнту БЕЛТА паведаміла начальнік аддзела прадпрыемства Алена Лаўрыновіч.
"Глыбоцкі МКК" пачаў асвойваць кітайскі рынак у мінулым годзе. Прадпрыемства шукала новы напрамак экспарту, каб пазбавіцца ад залежнасці ад расійскага рынку, а таксама для павелічэння даходаў. Пераразмеркаванне сіл ішло планамерна і паступова. І тым не менш пастаўкі сыроваткі ў Кітай у гэтым годзе значна выраслі да аналагічнага перыяду мінулага года. "За 8 месяцаў мінулага года на кітайскі рынак паставілі сыроваткі дэмінералізаванай на $174 тыс., у гэтым годзе рэалізавалі прадукцыі на $2 млн. У Кітаі больш аддаюць перавагу сыравіне, кансервы і прадукты глыбокай перапрацоўкі ў гэтай краіне бяруць неахвотна з-за іншых гастранамічных пажаданняў. Наша прадпрыемства вырабляе сыроватку круглы год, у сярэднім атрымліваецца амаль 800 т у месяц. І практычна ўся яна ідзе на кітайскі рынак", - адзначыла Алена Лаўрыновіч.
Яна дадала, што прадалі ўжо той аб'ём сыроваткі, які быў заяўлены на кастрычнік. Магутнасці камбіната даюць магчымасць павялічыць выпрацоўку каштоўнага прадукту, але пакуль ёсць пытанні па аб'ёмах сыравіны для вытворчасці.
Нязначныя партыі сухога малака таксама ідуць у Паднябесную, але ў большай ступені для разнастайнасці асартыменту. У гэтым годзе пробныя партыі любімага ў Беларусі дарослымі і дзецьмі ласунку - згушчанага малака з цукрам - адправіліся ў Малайзію. На прадпрыемстве спадзяюцца, што гэта стане першым крокам на рынак азіяцкай краіны. Таксама прадпрыемства пачало асвойваць японскі і в'етнамскі рынкі, куды адгрузілі некалькі партый хадавога тавару - сыроваткі. Камбінат заключыў кантракты з кампаніямі - буйнейшымі трэйдарамі, чые філіялы размешчаны па ўсім свеце, таму прадукцыя пад брэндам Глыбоцкага МКК будзе планамерна заваёўваць замежны рынак па ўсіх напрамках.-0-
