12 студзеня, Мінск /Кар. БЕЛТА/. Міністр антыманапольнага рэгулявання і гандлю Аляксей Багданаў і прадстаўнікі 16 буйных гандлёвых сетак падпісалі сёння пагадненне аб скідках на сацыяльна значныя тавары для слабаабароненых катэгорый насельніцтва, перадае карэспандэнт БЕЛТА.
"Упершыню рэалізуем такое пагадненне, гэта агульны падыход дзяржавы і бізнесу па падтрымцы слабаабароненых катэгорый насельніцтва. За апошні час прадукты харчавання выраслі ў цане, сітуацыя па студзені паказвае, што кошт сельгаспрадукцыі і прадуктаў харчавання прадаўжае расці. Фактараў шмат. Насельніцтву трэба дапамагаць спраўляцца з гэтым, таму вырашылі, што на сацыяльна значныя тавары слабаабароненым катэгорыям насельніцтва будзе прадастаўлена 10-працэнтная скідка", - расказаў Аляксей Багданаў.
Сярод гандлёвых сетак, якія падпісалі пагадненне, - ТАА "Санта Рытэйл", ТАА "Еўрагандаль", ЗАТ "Дабраном" ("Капеечка", "Маяк"), ТДА "Віталюр", ТАА "БелМаркетКомпані", ЗУП "Белвілесдэн ("Гіпа"). Плануецца, што спіс магазінаў, якія будуць прадастаўляць скідкі на сацыяльна значныя тавары для слабаабароненых катэгорый насельніцтва, будзе пашырацца.
Паводле слоў выканаўчага дырэктара Асацыяцыі рознічных сетак Наталлі Шаблінскай, каб рэалізаваць праект, праводзіліся глыбокія разлікі, аналізы і шматлікія кансультацыі. "Пачалі праводзіць акцыі з 2008 года, калі хацелі быць салідарнымі з пакупнікамі, імкнуліся прадаставіць ім магчымасць набыць тавар па зніжанай цане. Цяпер сітуацыя аналагічная. Мінулы год быў складаным, мы практычна не прыраслі ў даходах, страцілі ўдзельнікаў рынку, сярод іх засталіся толькі самыя моцныя, надзейныя і крэатыўныя. З імі і заключаем пагадненне. Спадзяюся, для слабаабароненых катэгорый грамадзян яно стане магчымасцю набыць неабходны тавар з максімальнай скідкай", - сказала яна.
Намеснік генеральнага дырэктара ТДА "Віталюр" Аляксандр Калеснікаў у сваю чаргу адзначыў, што дапамога сацыяльна слабаабароненым катэгорыям насельніцтва - даўні стратэгічны напрамак кампаніі. "Было б няправільна застацца ўбаку, таму вырашылі зрабіць гэта часткай сацыяльнай стратэгіі кампаніі. Сёння да 25 працэнтаў агульнай выручкі прыпадае на сацыяльна значную групу, паводле прагнозаў, пасля падпісання пагаднення яна павялічыцца ў два разы", - сказаў прадстаўнік гандлёвай сеткі.
Раней урад прыняў пастанову ад 23 лютага 2021 года нумар 100, якая прадугледжвае строгія меры рэгулявання цэн на сацыяльна значныя тавары першай неабходнасці. Пастановай нумар 713 ад 10 снежня 2021 года быў скарэкціраваны пералік тавараў, цэны на якія рэгулююцца дзяржавай. З 15 снежня 2021 года строгае рэгуляванне цэн распаўсюджваецца на 29 пазіцый сацыяльна значных тавараў (сярод іх мука, ячныя крупы, хлеб, ялавічына, свініна, куры, малако, кефір, смятана, тварог, некаторыя фрукты і агародніна, цукар і інш.), а таксама 50 пазіцый лекавых сродкаў.-0-
