26 красавіка, Мінск /Кар. БЕЛТА/. Пытанне стварэння гандлёвага дома Беларусі з прадстаўленнем у тым ліку шырокага спектра тавараў легпрама прапрацоўваецца беларускімі і чувашскімі ведамствамі. Аб гэтым расказаў намеснік старшыні канцэрна "Беллегпрам" Віталь Дзядзінец па выніках візіту афіцыйнай дэлегацыі Беларусі ў расійскі рэгіён, паведамілі БЕЛТА ў прэс-службе канцэрна.
"Цяпер у Рэспубліцы Чувашыя працуе дылер Баранавіцкага вытворчага баваўнянага аб'яднання, магазіны "Мілавіцы" і "Белвеста". Жыхары рэгіёна вельмі цэняць і любяць тавары нашага легпрама. Мы спадзяёмся, што пры ўмове адкрыцця гандлёвага дома Беларусі зможам шырэй прадставіць вытворцаў галіны", - сказаў Віталь Дзядзінец.
Таксама прадстаўнікі беларускай дэлегацыі вывучылі магчымасці закупкі неабходнай для айчынных тэкстыльшчыкаў і гарбароў хіміі.
На сустрэчы з кіраўніцтвам чувашскага "Тэхмашхолдынга" былі разгледжаны магчымасці паставак ткацкага абсталявання для тэкстыльных прадпрыемстваў Беларусі. "Холдынг, адзіны ў СНД, выпускае 5-метровыя станкі для вырабу поліпрапіленавых асноў, у якіх зацікаўлены нашы "Віцебскія дываны". На працягу тыдня з кіраўніцтвам прадпрыемства плануем адпрацаваць пытанні ўзаемадзеяння з "Тэхмашхолдынгам" па гэтых пазіцыях", - паведаміў намеснік старшыні канцэрна.-0-