Гандаль, інвестыцыі, бізнес. У якіх сферах Беларусь і Егіпет зацікаўлены развіваць супрацоўніцтва?

26 мая, Мінск /Кар. БЕЛТА/. Сёння ў Каіры адбылася сустрэча старшыні Палаты прадстаўнікоў Нацыянальнага сходу Рэспублікі Беларусь Ігара Сергяенкі са старшынёй Федэрацыі егіпецкіх гандлёвых палат Ахмедам эль-Вакілем. У час перагавораў размова ішла аб магчымасцях гандлёва-эканамічнага партнёрства Беларусі і Егіпта, інвестыцыйнай прывабнасці нашай краіны і яе патэнцыяле для вядзення бізнесу. Аб гэтым БЕЛТА паведамілі ў прэс-службе Палаты прадстаўнікоў.

У час сустрэчы Ігар Сергяенка нагадаў, што ў лютым 2020 года, калі прэзідэнты Беларусі і Егіпта сустракаліся ў Каіры, асноўная ўвага была ўдзелена менавіта гандлёва-эканамічным сувязям. У красавіку 2024 года ў час афіцыйнага візіту ўрадавай дэлегацыі Рэспублікі Беларусь у Егіпет было падпісана міжурадавае пагадненне аб сістэме садзейнічання ўзаемнаму гандлю. У пачатку бягучага года яго аператыўна ратыфікавалі беларускія парламентарыі.

"Сістэма садзейнічання гандлю прадугледжвае шэраг пераваг для ўдзельнікаў знешнеэканамічнай дзейнасці краін, якія заключылі такое пагадненне. Напрыклад, прыярытэтны парадак ажыццяўлення мытных аперацый, спрашчэнне мытных фармальнасцей, непрымяненне мытнага надгляду ў пунктах пропуску, за выключэннем асобных выпадкаў выяўлення высокай рызыкі парушэнняў. Гавару аб гэтым, каб падкрэсліць, што парламентарыі не стаяць у баку ад жыцця. Сёння мы знаходзімся тут менавіта для таго, каб надаць новы імпульс беларуска-егіпецкаму супрацоўніцтву ў розных галінах", - заявіў старшыня Палаты прадстаўнікоў.

Спікер падкрэсліў, што значным вынікам візіту стане падпісанне шэрага ўзаемавыгадных пагадненняў. "Гэтаму папярэднічала актыўная работа бакоў. І мы яе высока цэнім. Нам ёсць куды расці. Толькі ў таварнай структуры беларускага экспарту налічваецца больш за 1 100 таварных пазіцый. Вось чаму з дзейнасцю гандлёвых палат Беларусі і Егіпта мы звязваем вялікія надзеі", - падкрэсліў ён.

Гаворачы аб развіцці гандлёва-эканамічных сувязей, Ігар Сергяенка паведаміў старшыні Федэрацыі егіпецкіх гандлёвых палат Ахмеду эль-Вакілю, што ў мінулым годзе ў Беларусі быў прыняты закон "Аб інвестыцыях". У яго аснове стварэнне спрыяльных умоў для інвесціравання і паляпшэння бізнес-асяроддзя.

Старшыня Палаты прадстаўнікоў таксама запрасіў егіпецкіх бізнесменаў прыняць удзел у міжнародных выстаўках - Міжнародным форуме па штучным інтэлекце (13-14 чэрвеня) і БелАГРА (3-7 чэрвеня).

Старшыня Палаты прадстаўнікоў акцэнтаваў увагу на тым, што сёння Беларусь - гэта не толькі ўсім вядомыя брэнды, як МТЗ, МАЗ або "Амкадор". У нашай краіне ёсць моцныя кампаніі, якія ў сваіх нішах займаюць лідзіруючае становішча на сусветным рынку. Вынікі іх дзейнасці шырока выкарыстоўваюцца за мяжой. Напрыклад, кампанія "Рэгула", "ІЗАВАК", "Солар Лазерныя сістэмы" і іншыя.

Гаворачы аб харчовай бяспецы, старшыня Палаты прадстаўнікоў адзначыў, што экспарт беларускай сельгаспрадукцыі складае ў апошнія гады больш за $8 млрд у больш як 107 дзяржаў свету. У Беларусі налічваецца каля 1,8 тыс. адзінак малочнай прадукцыі, з іх - каля 500 найменняў сыроў.

"Наша краіна поўнасцю пакрывае патрэбнасці ў камбікармах і кармавых дабаўках, а таксама пастаўляе на экспарт больш за 85 працэнтаў вырабленай прадукцыі, сертыфікаванай па міжнародных стандартах", - расказаў у час сустрэчы спікер Палаты прадстаўнікоў.