28 снежня, Мінск /Кар. БЕЛТА/. Эканоміка адаптавалася да новых умоў, усе задачы ў 2023 годзе павінны быць выкананы. Аб гэтым заявіў прэм'ер-міністр Беларусі Раман Галоўчанка ў час пасяджэння наглядальнага савета Банка развіцця, перадае карэспандэнт БЕЛТА.
"Роля Банка развіцця істотная ў выкананні адной з галоўных задач, якая стаіць перад эканомікай у наступным годзе, - дасягненні параметраў, вызначаных указам кіраўніка дзяржавы. Нагадваю, гэта тэмп росту ВУП 103,8 працэнта, павелічэнне экспарту на 5,5 працэнта, прырост інвестыцый у асноўны капітал на 22,3 працэнта. У тых жа ўмовах, у якіх працавалі ў гэтым годзе, будзем працаваць, відавочна, і ў наступным. Шокавае ўздзеянне, якое, магчыма, было на першым этапе на асобныя галіны эканомікі, прайшло ўжо. Эканоміка адаптавалася да сітуацыі", - сказаў Раман Галоўчанка.
"Нягледзячы на цалкам чаканае зніжэнне ВУП у гэтым годзе, ёсць і істотныя пазітыўныя зрухі. Дзякуючы прынятым на ўзроўні ўрада мерам удалося спыніць разгон інфляцыі, цяпер мы назіраем дэфляцыйныя працэсы. Чакаю, што па выніках года мы ўтрымаемся ў калідоры 13 працэнтаў. Ідзём прыкладана роўна з Расіяй", - адзначыў прэм'ер-міністр.
Кіраўнік урада звярнуў увагу на тое, што ўдалося не дапусціць рэзкага зніжэння даходаў насельніцтва. "У лістападзе налічаная сярэднямесячная заработная плата ў доларах дасягнула рэкорднага значэння. Лічу, што па выніках снежня яна прырасце яшчэ крыху. Я спадзяюся, што прынамсі ў рэальным сектары эканомікі мы не дапусцім спаду рэальнай зарплаты, а пенсіі ў рэальным вылічэнні толькі прырастуць. Відаць, будзе пэўнае невялікае зніжэнне па бюджэтніках, але адпаведныя рашэнні прыняты, каб у наступным годзе гэта кампенсаваць", - падкрэсліў ён.
Раман Галоўчанка абазначыў, што перад Банкам развіцця стаіць задача садзейнічаць устойліваму развіццю эканомікі і выконваць спланаваныя мерапрыемствы па крэдытаванні розных праектаў. "Ключавая задача для банка - забеспячэнне нарошчвання інвестыцый у асноўны капітал і росту экспарту. Нагадваю, 129 рэгіянальных праектаў запланавана на наступны год, 59 імпартазамяшчальных, 12 інтэграцыйных. Важна разумець, наколькі паказчыкі дзейнасці банка балансуюць з пастаўленымі задачамі. Асабліва цікавіць сегмент рэгіянальнага развіцця - праграма "адзін раён - адзін праект", - дадаў ён.-0-
