1 кастрычніка, Ерэван /Кар. БЕЛТА/. Беларусь будзе актыўна займацца пытаннямі лічбавізацыі ў час старшынства ў ЕАЭС у 2025 годзе. Аб гэтым заявіў прэм'ер-міністр Беларусі Раман Галоўчанка на пленарным пасяджэнні Еўразійскага эканамічнага форуму "Лічбавізацыя ў сучасных рэаліях - імператыў для забеспячэння 4 свабод" з удзелам кіраўнікоў урадаў у Ерэване, паведамляе карэспандэнт БЕЛТА.
"У 2025 годзе нам трэба будзе падвесці вынікі выканання стратэгіі развіцця еўразійскай эканамічнай інтэграцыі да 2025 года. На аснове аналізу дасягнутых вынікаў неабходна паставіць дакладныя арыенціры інтэграцыйнай работы па выкананні задач, зафіксаваных у дэкларацыі аб далейшым развіцці эканамічных працэсаў у ЕАЭС да 2030 года і на перыяд да 2045 года. Гэта работа якраз прыпадзе на перыяд старшынства Рэспублікі Беларусь у Еўразійскім эканамічным саюзе ў 2025 годзе. І я хачу ўсіх запэўніць, што мы маем намер актыўна займацца пытаннямі лічбавізацыі і развіцця высокіх тэхналогій. Мы лічым гэта адным з важнейшых напрамкаў развіцця саюза", - сказаў Раман Галоўчанка.
Краіны "пяцёркі" праводзяць актыўную работу па фарміраванні агульнага рынку саюза, які прызначаны забяспечыць чатыры свабоды: свабоду руху тавараў, паслуг, капіталу і рабочай сілы на ўсёй прасторы саюза.
ІІІ Еўразійскі эканамічны форум праходзіць 30 верасня - 1 кастрычніка 2024 года ў Ерэване (Рэспубліка Арменія). Форум прымеркаваны да пасяджэння Еўразійскага міжурадавага савета з удзелам кіраўнікоў урадаў дзяржаў - членаў Еўразійскага эканамічнага саюза і дзяржаў-наглядальнікаў. Мерапрыемства праходзіць у рамках старшынства Рэспублікі Арменія ў органах Еўразійскага эканамічнага саюза ў 2024 годзе.-0-
Фота Паўла Арлоўскага
Падпісвайцеся на нас у
