1 верасня, Талачынскі раён /Кар. БЕЛТА/. Для захаванасці ўраджаю неабходна будаваць высокатэхналагічныя сховішчы новага тыпу. Аб гэтым сказаў прэм'ер-міністр Раман Галоўчанка ў час наведвання Талачынскага кансервавага завода, перадае БЕЛТА.
"У краіне хапае бульбасховішчаў для таго, каб умясціць увесь сабраны ўраджай, - адзначыў ён. - Па агародніне і частцы садавіны (такой як яблыкі), наш аб'ём вытворчасці шматразова пераўзыходзіць аб'ём спажывання. Усё, што трэба захаваць для сябе і ўнутранага рынку, захоўваецца. Іншае пытанне - якасць захоўвання. Так, ёсць сховішчы рознага тыпу, і нават самыя простыя з іх даюць магчымасць захаваць ураджай у нармальным выглядзе да сакавіка. Крытычнымі для захаванасці прадукцыі з'яўляюцца май і чэрвень. Каб не было пажухлых яблыкаў і вялай бульбы, трэба будаваць сховішчы іншага тыпу і на іншых тэхналогіях. Гэта не такая складаная рэч, але даволі дарагая, таму мы цяпер паступова ідзём да таго, каб выводзіць старыя сховішчы са строю і замяшчаць іх больш новымі".
Менавіта гэта пытанне - захаванасці ўраджаю - абмяркоўвалася на Талачынскім кансервавым заводзе, якому неабходна новае бульбасховішча з газавым асяроддзем на 20 тыс. т прадукцыі. "Размова ідзе аб будаўніцтве суперсучаснага сховішча для таго, каб адчувальны да ўмоў захоўвання караняплод мог потым выкарыстоўвацца пры вытворчасці бульбы фры, - удакладніў прэм'ер-міністр. - Па ўмовах ёсць свае патрабаванні, у тым ліку па вільготнасці і тэмпературы. Праект дарагі, сёння мы яго абмеркавалі і прапрацавалі схемы фінансавання, таму будзем абавязкова рухацца ў гэтым напрамку".
Раман Галоўчанка звярнуў увагу, што гэты год парадаваў добрым ураджаем не толькі па збожжавых каласавых, але таксама па агародніне і садавіне: "Падкрэслю, уся агародніна будзе прызапашана і для гандлю, і для сферы грамадскага харчавання, і для сацыяльных устаноў. Ураджай вялікі, таму чакаецца зніжэнне цэн. У гэтым годзе не павінна быць сітуацыі, як у мінулым, калі цэны на ўнутраным рынку ў многім раслі з-за высокіх цэн у Расіі - усе імкнуліся прадаць на экспарт. Таму мы глядзелі ўнутраны рынак і фіксавалі цэны, каб тавар застаўся тут даступным. У гэтым годзе прымаюцца меры для павелічэння аб'ёмаў гарантаванай закладкі. Яны ўзрастуць прыблізна на 30 працэнтаў. Ужо цяпер заключаюцца доўгатэрміновыя дагаворы гандлёвых сетак з пастаўшчыкамі і тымі, хто будзе захоўваць гэту бульбу. Вытворца будзе ведаць, што ў яго забяруць прадукцыю, а прадавец - упэўнены, што ў яго будзе пастаўшчык".
Паводле слоў Рамана Галоўчанкі, на сёння каля 40 працэнтаў ад агульнага аб'ёму спажывання бульбы ўжо закантрактавана. У бліжэйшы час гэта пытанне будзе даведзена да канца і сітуацыя па цэнах стане больш стабільная і прагназуемая.-0-
