10 снежня, Мінск /Кацярына Крышэнік - БЕЛТА/. Беларусь і Расія вядуць перагаворы па ўніфікацыі акцызнай палітыкі. Пры гэтым галоўнай умовай беларускага боку на перагаворах з'яўляецца патрабаванне, каб змяненні не паўплывалі негатыўна на ўнутраны рынак. Аб гэтым паведаміў журналістам міністр фінансаў Максім Ермаловіч па выніках нарады ў Прэзідэнта, дзе абмяркоўваліся пытанні павышэння эфектыўнасці работы тытунёвай галіны, перадае карэспандэнт БЕЛТА.
"Цяпер вядуцца перагаворы па ўніфікацыі акцызнай палітыкі і ў рамках ЕАЭС, і ў рамках нашых узаемаадносін з Расіяй", - пацвердзіў міністр, адказваючы на пытанне аб тым, як гарманізацыя падатковага заканадаўства з Расіяй можа паўплываць на цэны на тытунёвую прадукцыю ў Беларусі.
"Прэзідэнтам дакладна абазначаны ўмовы далейшага руху па акцызах: гэта не павінна негатыўна паўплываць на стан унутранага рынку, (павялічыць. - Заўвага БЕЛТА) абарот нелегальнай прадукцыі. Адпаведна, не павінна прывесці да рэзкага павелічэння цэн на ўнутраным рынку для нашага насельніцтва", - падкрэсліў Максім Ермаловіч.-0-