14 красавіка, Мінск /Кар. БЕЛТА/. Ядзерная бяспека - вышэйшы прыярытэт для кіраўніцтва Беларускай АЭС. Аб гэтым заявіў кіраўнік каманды экспертаў Маскоўскага цэнтра Сусветнай асацыяцыі арганізацый, якія эксплуатуюць атамныя электрастанцыі (САА АЭС), Дзмітрый Чычыкін у відэакаментарыі, размешчаным на Youtube-канале БелАЭС, паведамляе БЕЛТА.
Міжнародныя эксперты з 5 па 13 красавіка правялі місію тэхнічнай падтрымкі па ацэнцы эксплуатацыйнай гатоўнасці другога энергаблока БелАЭС. Акрамя прадстаўнікоў САА АЭС у экспертную групу ўвайшлі спецыялісты дзеючых АЭС Расіі, Балгарыі, ААЭ і Турцыі. Паводле слоў Дзмітрыя Чычыкіна, ацэнка вялася па дзевяці вытворчых галінах.
"Мы правялі глыбокі аналіз бягучага стану гатоўнасці энергаблока нумар 2 да маючай адбыцца загрузкі паліва і наступнага ўключэння ў электраэнергетычную сетку Беларусі, зрабілі зрэз бягучага стану станцыі адносна наступнага пуску. Хачу адзначыць, што станцыя добраахвотна запрасіла каманду знешніх экспертаў для дадатковай ацэнкі рэалізацыі праекта. Гэта ацэнка не з'яўляецца абавязковай у фармаце работы САА АЭС", - расказаў ён.
"Мы бачым, што станцыя дэманструе адкрытасць, прафесіяналізм сваіх работнікаў. Я на гэтай станцыі ўжо, напэўна, раз шосты. Магу сказаць, што праект развіваецца. Самае галоўнае, мы бачым, што для кіраўніцтва станцыі ядзерная бяспека - вышэйшы прыярытэт", - адзначыў Дзмітрый Чычыкін.
Беларуская АЭС з двума рэактарамі ВВЭР-1200 сумарнай магутнасцю 2400 МВт будуецца па расійскім праекце "АЭС-2006" паблізу Астраўца Гродзенскай вобласці.-0-
vvv1
