23 верасня, Масква /Эдуард Півавар - БЕЛТА/. Абрушыць эканоміку ўласнай краіны - падобна да самагубства. Так у размове з карэспандэнтам БЕЛТА дырэктар Інстытута стратэгічных даследаванняў і прагнозаў Расійскага ўніверсітэта дружбы народаў Дзмітрый Ягорчанкаў пракаменціраваў заклікі беларускіх апазіцыянераў скупляць валюту, не плаціць падаткі і за паслугі ЖКГ, не купляць айчынныя тавары.
"Грамадзянам Беларусі прапануюць самагубства дзеля знешняй ідэі, - сказаў Дзмітрый Ягорчанкаў. - Маўляў, давайце загубім сябе дзеля таго, каб ідэалы свабоды заззялі над усёй Еўропай. Але ніхто пры гэтым не гаворыць: а што будзе з Беларуссю? Што будзе з працоўнымі месцамі, з эканомікай? Куды паедуць працаваць беларусы, калі яны абрушаць сваю ўласную эканоміку? Я вельмі сумняваюся, што ў Еўропе, у цудоўных еўрапейскіх дзяржавах - суседніх і крыху больш далёкіх ад Беларусі - так моцна чакаюць кваліфікаваных беларускіх кадраў".
Эксперт параіў рабіць высновы з нядаўняй гісторыі. "Ні ў якім разе нельга цяпер паддацца на гэтыя правакацыі і выстраліць сабе ў галаву, - лічыць ён. - У нас ужо быў гістарычны прыклад, вельмі трагічны, калі дакладна на такія ж правакацыі паддалося насельніцтва Савецкага Саюза і дэ-факта краіна самазнішчылася. Давайце рабіць высновы з гэтых гістарычных урокаў".
"Вядома, любы чалавек хоча жыць лепей. Але насельніцтва Беларусі вельмі добра разумее, што гэта лепшае жыццё не возьмецца з дабрадушных заяў нейкіх маладых людзей з Telegram-каналаў. Таму ўнутраны самабайкот сваёй жа ўласнай эканоміцы - гэта поўная дыскваліфікацыя тых людзей, якія спрабуюць укідваць такія сэнсы ў грамадскую свядомасць", - падкрэсліў дырэктар Інстытута стратэгічных даследаванняў і прагнозаў.-0-
