8 кастрычніка, Мінск /Кар. БЕЛТА/. Далучэнне Беларусі да Сусветнай гандлёвай арганізацыі - прыярытэтная задача з пункту гледжання Еўразійскага эканамічнага саюза. Такое меркаванне на палях форуму "Мінскі дыялог" карэспандэнту БЕЛТА выказаў намеснік дырэктара Інстытута сусветнай эканомікі і міжнародных адносін Расійскай акадэміі навук, прафесар, член-карэспандэнт РАН Сяргей Афонцаў.
Субяседнік адзначыў, што ЕАЭС і ЕС маюць шмат пунктаў прыкладання сумесных намаганняў, каб дапамагчы краінам Усходняй Еўропы забяспечыць большую ступень самастойнасці для ўдзелу ў сусветнай эканоміцы. "У прыватнасці, стаіць задача далучэння Беларусі да СГА, якая з пункту гледжання Еўразійскага эканамічнага саюза цяпер становіцца прыярытэтнай. З пазіцыі ЕС гэта значна аблегчыла б супрацоўніцтва паміж еўрапейскімі і беларускімі кампаніямі", - сказаў Сяргей Афонцаў. "Гэта задача магла б вырашацца з партнёрскай дапамогай ЕАЭС і ЕС, а таксама асобных краін", - дадаў ён.
Расіі, напрыклад, ёсць што сказаць у частцы механізмаў прыняцця рашэнняў, рызык, якія ўзнікаюць. "А пра ЕС тут і гаварыць няма чаго. Гэта роўна тое, што патрабуе партнёрская ўключанасць Еўрасаюза, а не проста нейкіх крытычных заўваг", - лічыць Сяргей Афонцаў.
Эксперт растлумачыў, што нацыянальныя заканадаўствы першапачаткова не павінны адпавядаць стандартам СГА. Гарманізацыя патрабуе комплексу змяненняў. Краіну, якая гатова і хоча ўступіць у арганізацыю, чакае вялікая работа. "Неабходна партнёрская дапамога тых, хто гэту работу правёў або ведае, як яе правесці", - адзначыў прафесар.
Як паведамлялася, Беларусь гатова завяршыць перагаворы па далучэнні да СГА да 12-й міністэрскай канферэнцыі арганізацыі ў чэрвені 2020 года.-0-
