Фота з архіва
7 лютага, Мінск /Кар. БЕЛТА/. Экспарт прадпрыемстваў Мінпрама ва Узбекістан у 2023 годзе ўзрос амаль на 45 працэнтаў, паведамілі карэспандэнту БЕЛТА ў прэс-службе Міністэрства прамысловасці.
Афіцыйная дэлегацыя Міністэрства прамысловасці Беларусі на чале з міністрам Аляксандрам Рагожнікам прымае ўдзел у Форуме рэгіёнаў Беларусі і Узбекістана.
Па выніках 2023 года захавана дадатная дынаміка супрацоўніцтва з Узбекістанам у прамысловай сферы. Тавараабарот прадпрыемстваў Мінпрама з Узбекістанам павялічыўся на трэць у параўнанні з 2022 годам, у тым ліку экспарт узрос амаль на 45 працэнтаў. "Паказчыкі ўзаемнага гандлю сведчаць аб высокай ступені зацікаўленасці бакоў у далейшым развіцці, умацаванні і пашырэнні беларуска-ўзбекскага ўзаемадзеяння. Супрацоўніцтва ў сферы прамысловасці не абмяжоўваецца ўзаемнымі пастаўкамі прадукцыі. Прамысловая кааперацыя традыцыйна з’яўляецца адным з прыярытэтных напрамкаў двухбаковага ўзаемадзеяння", - падкрэслілі ў прэс-службе.
Так, ВА "Энергакамплект" сумесна з кампаніяй ТАА "YES" вядуць работу па лакалізацыі ва Узбекістане вытворчасці кабельна-правадніковай прадукцыі. Мінскі аўтамабільны завод з 2018 года ўзаемадзейнічае з ТАА "Krantas Group" па вытворчасці ва Узбекістане спецыяльнай тэхнікі. За перыяд супрацоўніцтва сумесна выраблена і рэалізавана ўзбекскім спажыўцам больш за 200 адзінак спецыяльнай тэхнікі (аўтацыстэрны, у прыватнасці, бензавозы і вадавозы, смеццявозы, кранавая тэхніка). У сваю чаргу, узбекская кампанія ажыццяўляе ў рамках кааперацыі пастаўку ў Беларусь аўтакранавых стрэл у адрас завода "Магілёўтрансмаш" для далейшай вытворчасці грузапад’ёмных кранаў.
У канцы мінулага года пачата рэалізацыя новага кааперацыйнага праекта па арганізацыі ва Узбекістане зборачнай вытворчасці дызель-генератарных установак і кампрэсарных станцый. У праекце ўдзельнічаюць Мінскі маторны завод і ўзбекская кампанія ТАА "PLANETA SERVIS". У 2024 годзе прадугледжваецца пачатак практычнай рэалізацыі з ТАА "PLANETA SERVIS" праекта ў сферы трактарабудавання.
Вялікі патэнцыял для далейшага развіцця ўзаемавыгаднага супрацоўніцтва ёсць у сферы станкабудавання.
Прамысловая частка беларускай дэлегацыі на Форуме Беларусі і Узбекістана прадстаўлена кіраўнікамі больш як дзесяці падведамных Мінпраму прадпрыемстваў, па выніках форуму чакаецца падпісанне кантрактаў на суму каля $45 млн.
Дасягнутыя ў рамках візіту дэлегацыі Міністэрства прамысловасці Беларусі ва Узбекістан дамоўленасці будуць садзейнічаць далейшаму ўмацаванню двухбаковых адносін у прамысловай сферы.-0-
