4 кастрычніка, Мінск /Кар. БЕЛТА/. Еўрапейскі бізнес не спяшаецца сыходзіць з рынку Саюзнай дзяржавы, паколькі не хоча несці вялікія страты. Аб гэтым расказала карэспандэнту БЕЛТА доктар эканамічных навук, прафесар Наталля Кірэенка.
"Прадстаўнікі еўрапейскага бізнесу абсалютна адэкватна разумеюць, што сыход з вялікага рынку Саюзнай дзяржавы нясе вялікія страты. Гэту нішу зоймуць іншыя пастаўшчыкі і прадстаўнікі азіяцкіх краін, Блізкага Усходу і гэтак далей. Калі яны сыдуць, то вярнуцца ўжо будзе практычна немагчыма. Тэарэтычна застанецца 1-2 працэнты, а практычна - ніхто. Таму еўрапейскі бізнес не спяшаецца сыходзіць, чакаючы найбольш прымальных варыянтаў з боку сваіх урадаў па вырашэнні эканамічнай сітуацыі", - адзначыла Наталля Кірэенка.
Павінна быць абдуманая эканамічная палітыка на карысць насельніцтва, таму што гэта сур'ёзныя складанасці для бізнесу, упэўнена эксперт. "Прадпрымальнікі падаўжаюць лагістычны ланцужок пастаўкі прадукцыі, з'яўляецца больш пасрэдніцкіх структур у гандлі, у банкаўскай і фінансавай сферах. Яны знойдуць выхад, але для канечнага пакупніка кошт прадукцыі будзе намнога вышэйшы, што таксама не менш важна", - дадала эканаміст.
Беларусь заўсёды была і застаецца прывабнай для замежных партнёраў, таму што гэта цэнтр Еўропы, а значыць, лагістыка і транзітныя перавозкі прадукцыі ў розныя напрамкі - Азію, Расію, Еўропу. "Прэзідэнт на кожнай з нарад гаворыць аб тым, што мы адкрыты для эканамічнага супрацоўніцтва, але яно павінна быць узаемавыгадным і доўгатэрміновым. У гэтых рашэннях у любым выпадку павінны пераважаць нацыянальныя прыярытэты і інтарэсы", - рэзюмавала Наталля Кірэенка.-0-
