28 снежня, Масква /Эдуард Півавар - БЕЛТА/. Калегія Еўразійскай эканамічнай камісіі сёння прыняла рашэнне аб увядзенні забароны на вываз асобных відаў лесаматэрыялаў за межы Еўразійскага эканамічнага саюза, паведамілі карэспандэнту БЕЛТА ў гандлёвым блоку ЕЭК.
"Калегія ЕЭК прыняла рашэнне аб увядзенні адзінай меры нетарыфнага рэгулявання ў выглядзе колькаснага абмежавання экспарту адносна асобных відаў лесаматэрыялаў (з кодаў 4401, 4403 і 4407 ТН ЗЭД ЕАЭС). Мера прадугледжвае нулявую квоту на вываз тавару з усіх краін Еўразійскага эканамічнага саюза і ўстаноўлена на бестэрміновай аснове", - адзначылі ў гандлёвым блоку.
"Калегія прадаўжае работу, накіраваную на ўніфікацыю прымяняемых на нацыянальным узроўні аднабаковых мер па рэгуляванні вывазу асобных відаў прадукцыі", - пракаменціраваў прынятае рашэнне член Калегіі (міністр) па гандлі ЕЭК Андрэй Сляпнёў. Ён падкрэсліў, што лесаматэрыялы ўключаны ў пералік тавараў, якія з'яўляюцца істотна важнымі для ўнутранага рынку ЕАЭС.
Рашэнне Калегіі ЕЭК уступае ў сілу праз 30 каляндарных дзён з даты яго афіцыйнага апублікавання.
"Цяпер адносна асобных відаў лесаматэрыялаў прымяняюцца аднабаковыя забароны на вываз у Казахстане і Кыргызстане. У Беларусі і Расіі ўстаноўлены стаўкі вывазных мытных пошлін. Са студзеня 2022 года ў Расійскай Федэрацыі ўводзяцца павышаныя стаўкі вывазных мытных пошлін на драўніну з вільготнасцю большай за 22 працэнты і таўшчынёй і шырынёй большай за 10 см", - дадалі ў ЕЭК.-0-
