21 красавіка, Масква /Эдуард Півавар - БЕЛТА/. Калегія Еўразійскай эканамічнай камісіі ўстанавіла ўвазную мытную пошліну ў памеры 5 працэнтаў у дачыненні да асобных відаў святлодыёдных лямп (LED), што прымяняюцца для бытавога, прамысловага і вулічнага асвятлення, паведамілі БЕЛТА ў прэс-службе ЕЭК.
Тэрмін дзеяння гэтай меры абмежаваны 31 снежня 2025 года. "Рашэнне накіравана на павышэнне долі айчынных тавараў на ўнутраным рынку і імпартазамяшчэнне, а таксама павышэнне канкурэнтаздольнасці прадпрыемстваў Еўразійскага эканамічнага саюза, якія займаюцца выпускам святлодыёдных лямп", - сказаў дырэктар дэпартамента мытна-тарыфнага і нетарыфнага рэгулявання ЕЭК Ваагн Казаран.
"Паколькі на камплектуючыя для вытворчасці святлодыёдных лямп устаноўлены ўвазныя мытныя пошліны ў памеры 5-14 працэнтаў, а ў дачыненні да гатовых вырабаў у цяперашні момант прымяняецца нулявая стаўка, то прапанаваная мера таксама дасць магчымасць захаваць прынцып эскалацыі адзінага мытнага тарыфу Еўразійскага эканамічнага саюза, - дадалі ў прэс-службе. - Прыняцце гэтага рашэння ўзгадняецца з задачай па стварэнні еўразійскай святлодыёднай тэхналагічнай платформы (распараджэнне Савета ЕЭК нумар 32 ад 18 кастрычніка 2016 года). Сярод мэт гэтай платформы - прыцягненне перадавых тэхналогій у галіне святлодыёднай тэхнікі і стварэнне высакаякаснай даўгавечнай святлодыёднай прадукцыі".-0-
