16 снежня, Мінск /Кар. БЕЛТА/. Зняцце бар'ераў і абмежаванняў на рынку Еўразійскага эканамічнага саюза, устанаўленне новых патрабаванняў да выпускаемай у абарачэнне прадукцыі, далейшае забеспячэнне яе бяспекі і адпаведнасці сучаснаму навукова-тэхнічнаму ўзроўню - такія тэмы сталі асноўнымі на пасяджэнні Кансультатыўнага камітэта па тэхнічным рэгуляванні, прымяненні санітарных, ветэрынарных і фітасанітарных мер, праведзеным пад старшынствам члена Калегіі (міністра) па тэхнічным рэгуляванні Еўразійскай эканамічнай камісіі Віктара Назаранкі, паведамілі БЕЛТА ў ЕЭК.
Адобраны для разгляду Калегіяй ЕЭК узгоднены дзяржавамі саюза праект тэхрэгламенту ЕАЭС "Аб бяспецы высакавольтнага абсталявання", а таксама праект змяненняў у тэхрэгламент ЕАЭС "Аб бяспецы абсталявання, якое працуе пад залішнім ціскам". Праект змяненняў прадугледжвае ўвядзенне новых тэрмінаў, удакладненне асобных палажэнняў тэхрэгламенту, унясенне тэхнічных правак з улікам практыкі яго прымянення.
Для забеспячэння рэалізацыі саюзных тэхрэгламентаў "Аб бяспецы машын і абсталявання" і "Аб бяспецы ўпакаванай пітной вады, уключаючы прыродную мінеральную ваду" адобраны для разгляду Калегіяй ЕЭК змяненні ў пералікі стандартаў.
Члены Кансультатыўнага камітэта ў цэлым адобрылі для разгляду Калегіяй ЕЭК праекты змяненняў у праграмы па распрацоўцы (унясенні змяненняў, пераглядзе) міждзяржаўных стандартаў да тэхрэгламентаў саюза "Аб бяспецы харчовай прадукцыі" і "Аб бяспецы апаратаў, якія працуюць на газападобным паліве".
У сферы прымянення санітарных, фітасанітарных і ветэрынарных мер вырашана накіраваць на калегію ЕЭК праект рашэння Савета ЕЭК "Аб унясенні змяненняў у рашэнне Камісіі Мытнага саюза ад 18 чэрвеня 2010 г. нумар 318", які прадугледжвае карэкціроўку гэтага дакумента ў частцы ўнясення правак юрыдычна-тэхнічнага характару. Акрамя таго, падтрымана зацвярджэнне ў новых рэдакцыях шэрага дакументаў, што рэгламентуюць дзейнасць створаных пры Кансультатыўным камітэце падкамітэтаў па санітарных, ветэрынарна-санітарных і фітасанітарных мерах, а таксама экспертных, рабочых і часовых рабочых груп у сферы каранцінных фітасанітарных мер.-0-
