20 кастрычніка, Масква /Эдуард Півавар - БЕЛТА/. Калегія Еўразійскай эканамічнай камісіі прыняла рашэнне аб зніжэнні ўвазных мытных пошлін на марганцавыя руды і канцэнтраты з 5 працэнтаў да 0 працэнтаў тэрмінам на два гады, паведамілі БЕЛТА ў прэс-службе ЕЭК.
Марганцавыя руды і канцэнтраты з'яўляюцца сыравінай для вытворчасці ферасплаваў у металургічнай прамысловасці. У Еўразійскім эканамічным саюзе гэта прадукцыя вырабляецца толькі ў Казахстане, але існуючыя аб'ёмы не даюць магчымасці забяспечыць патрэбнасці краін ЕАЭС у поўнай меры.
"Увядзенне прапанаванай меры будзе садзейнічаць устараненню дэфіцыту разглядаемых тавараў на рынку ЕАЭС, павышэнню канкурэнтаздольнасці і павелічэнню загрузкі вытворчых магутнасцей па выпуску ферасплаваў у ЕАЭС", - адзначыў дырэктар дэпартамента мытна-тарыфнага і нетарыфнага рэгулявання ЕЭК Ваагн Казаран.-0-