2 чэрвеня, Мінск /Кар. БЕЛТА/. Дзяржаўны камітэт па маёмасці ў поўным аб'ёме мае інфармацыю аб зямлі і аб'ектах нерухомай маёмасці ў лічбавым выглядзе. Аб гэтым праінфармаваў намеснік старшыні Дзяржкаммаёмасці Мікалай Бабёр на XXVII Міжнародным форуме па інфармацыйна-камунікацыйных тэхналогіях "ТІБО-2021", паведамляе БЕЛТА са спасылкай на сайт камітэта.
На міжнародным форуме Дзяржкаммаёмасць прадстаўляюць Нацыянальнае кадастравае агенцтва, Мінскае абласное агенцтва па дзяржаўнай рэгістрацыі і зямельным кадастры, "Белгеадэзія", "Белкартаграфія", "БелПСГАГВ", "Белдзіпразем". Гэтыя арганізацыі і прадпрыемствы сістэмы Дзяржкаммаёмасці прэзентуюць наведвальнікам функцыянал распрацаваных інфармацыйных рэсурсаў, дэманструюць новыя тэхналогіі ў галіне фотаграметрыі, паслугі па стварэнні інтэрактыўнага 5D-пашпарта і картаграфічныя матэрыялы.
"Дэвіз нашай экспазіцыі: нацыянальная інфраструктура прасторавых даных - аснова развіцця лічбавай эканомікі, - адзначыў намеснік старшыні Дзяржкаммаёмасці Мікалай Бабёр. - У сістэме прадпрыемстваў камітэта ствараюцца і вядуцца лічбавыя базы прасторавых даных, якія валодаюць поўным спектрам характарыстык па зямельных участках, аб'ектах нерухомай маёмасці. У далейшым яны могуць выкарыстоўвацца ў розных галінах эканомікі".
Таксама Мікалай Бабёр дадаў, што на сённяшні дзень Дзяржкаммаёмасць у поўным аб'ёме мае інфармацыю аб зямлі і аб'ектах нерухомай маёмасці ў лічбавым выглядзе. На аснове гэтых даных ствараюцца лічбавыя сэрвісы, якія даюць магчымасць аказваць розныя анлайн-паслугі як для юрыдычных і фізічных асоб на тэрыторыі Беларусі, так і для зацікаўленых замежных інвестараў.
"Асабліва гэта становіцца актуальным у перыяд пандэміі. Магчымасць інтэрактыўнага доступу да інфармацыі дазваляе вывучыць аб'ект нерухомай маёмасці або зямельны ўчастак, у які мяркуецца інвесціраваць", - рэзюмаваў намеснік старшыні.
XXVII Міжнародны форум па інфармацыйна-камунікацыйных тэхналогіях "ТІБО-2021" праходзіць у Мінску з 1 па 4 чэрвеня. У мерапрыемстве традыцыйна прымаюць удзел буйнейшыя айчынныя і замежныя вытворцы тэлекамунікацыйнага абсталявання, апаратных сродкаў і праграмнага забеспячэння, кампаніі - аператары мабільнай і фіксаванай сувязі, распрацоўшчыкі і пастаўшчыкі высокатэхналагічных прадуктаў, сістэм бяспекі, інтэлектуальных рашэнняў і сэрвісаў для масавага і карпаратыўнага сегмента. У гэтым годзе ўдзельнікамі сталі больш за 100 арганізацый з Азербайджана, Беларусі, Казахстана, Кітая, Кыргызстана, Аб'яднаных Арабскіх Эміратаў, Расійскай Федэрацыі, Узбекістана і інш.-0-
