12 лютага, Мінск /Кар. БЕЛТА/. "Белнафтахім" вызначыў асноўныя задачы на 2020 год на пасяджэнні савета канцэрна. Такая інфармацыя размешчана на сайце канцэрна, паведамляе БЕЛТА.
У іх ліку - выкананне ўстаноўленых ключавых паказчыкаў, дыверсіфікацыя паставак нафты на беларускія НПЗ, задавольванне ў поўным аб'ёме патрэбнасцей унутранага рынку ў нафтапрадуктах і прадукцыі нафтахіміі, павышэнне аперацыйнай эфектыўнасці ва ўсіх арганізацыях, рост прадукцыйнасці працы.
"Нягледзячы на шэраг працэсаў (у тым ліку інцыдэнт з пастаўкай бруднай нафты), якія мелі экстранны характар і аказалі негатыўны ўплыў на аб'ёмы паставак нафты і ўмовы яе перапрацоўкі, канцэрну і прадпрыемствам галіны ўдалося мінімізаваць сістэмныя вынікі і практычна выйсці на планавыя паказчыкі", - адзначылі ў "Белнафтахіме". На пасяджэнні дадзена ацэнка новым умовам, у якіх у бліжэйшай перспектыве вымушаны будуць працаваць арганізацыі галіны, вызначаны стратэгія і шляхі адаптацыі да новых параметраў функцыянавання.
Старшыня канцэрна Андрэй Рыбакоў прааналізаваў работу ўсіх арганізацый канцэрна і даў даручэнні кіраўнікам па ўдасканаленні знешнеэканамічнай дзейнасці, своечасовым вяртанні валютнай выручкі, зніжэнні затрат на вытворчасць.
Асаблівая ўвага таксама ўдзялялася стану бяспекі вытворчай дзейнасці, мерам па папярэджанні аварыйнасці, вытворчага траўматызму і надзвычайных сітуацый, арганізацыі ўладальніцкага нагляду ў гаспадарчых таварыствах, акцыі (долі ў статутных фондах) якіх знаходзяцца ў веданні канцэрна "Белнафтахім".-0-