21 студзеня, Мінск /Юлія Огнева - БЕЛТА/. Доля магазінаў гандлёвых сетак у Беларусі складае 61 працэнт ад агульнай колькасці, паведаміла начальнік упраўлення арганізацыі гандлю і паслуг Міністэрства гандлю Віялета Бразоўская, перадае карэспандэнт БЕЛТА.
"Колькасць сеткавых магазінаў цяпер па краіне складае 25 тыс. 928, або 61 працэнт ад агульнай колькасці. Гандлёвая плошча сеткавых магазінаў у 2015 годзе прырасла - на сённяшні дзень яна складае 3,6 млн кв.м, або 83 працэнты ад агульнай гандлёвай плошчы магазінаў", - адзначыла Віялета Бразоўская.
Начальнік упраўлення назвала топ-5 самых буйных гандлёвых сетак: сярод прадуктовых гэта "Еўраопт", "Карона", "Алмі", "Рублёўскі" і "Дабраном", непрадуктовых - "AMI мэбля", "Пінскдрэў", "Востраў чысціні", "Пяты элемент" і "Буслiк".
Паводле слоў Віялеты Бразоўскай, забяспечанасць гандлёвымі плошчамі на 1 тыс. чалавек у Беларусі ў 2015 годзе вырасла на 46,5 кв.м і на 1 студзеня 2016 года склала 574,5 кв.м.-0-
