16 верасня, Мінск /Кар. БЕЛТА/. Адмена ўказа аб вызваленні ад ПДВ тавараў, што ўвозяцца ў Беларусь для наступнага экспарту, не паўплывала на транзіт праз тэрыторыю краіны. Аб гэтым паведаміў сёння журналістам старшыня Дзяржаўнага мытнага камітэта Уладзімір Арлоўскі, перадае карэспандэнт БЕЛТА.
"Грузапаток з верасня не зменшыўся. Ён знаходзіцца на такім жа высокім узроўні, як і ў папярэднія восем месяцаў. Мы ідзём з вялікім апярэджаннем у параўнанні з графікам мінулага года. Таму якіх-небудзь змяненняў у транзіце ў сувязі з адменай указа мы не назіраем", - сказаў Уладзімір Арлоўскі.
Як паведамлялася, з 31 жніўня 2021 года прызнаны страціўшым сілу ўказ ад 11 жніўня 2011 года нумар 358 "Аб стымуляванні рэалізацыі тавараў", які прадугледжваў вызваленне ад падатку на дабаўленую вартасць упаўнаважанымі эканамічнымі аператарамі тавараў пры ўмове іх наступнага экспарту названымі асобамі.-0-
