21 лістапада, Мінск /Кар. БЕЛТА/. Беларусь паспяхова перанакіроўвае экспартныя патокі з недружалюбных краін на іншыя напрамкі. Аб гэтым карэспандэнту БЕЛТА сказаў член Пастаяннай камісіі па эканамічнай палітыцы Палаты прадстаўнікоў Анатоль Насеня.
Паводле яго слоў, прамыя страты ад спынення паставак у Еўропу склалі каля $6 млрд, але на рынках Расіі і Кітая наша краіна ўжо аднавіла $5 млрд. "Ідзе сістэмная пераарыентацыя транспартных патокаў з недружалюбных краін на іншыя напрамкі. Дзякуючы гэтаму на рынках Расіі і Кітая мы ўжо змаглі аднавіць амаль 80 працэнтаў страт. З выхадам брэндавых кампаній з Расіі з'явіліся нішы для нашых вытворцаў. Мы іх можам заняць. І цяпер у гэтым напрамку ідзе актыўная работа", - сказаў Анатоль Насеня.
Дэпутат акцэнтаваў увагу, што ва ўмовах фактычнай блакады беларускага экспарту Расія забяспечвае перавалку шырокага спектра нашых грузаў на рынкі трэціх краін. Толькі за дзевяць месяцаў транзіт беларускіх грузаў праз расійскія парты павялічыўся ў 2,2 раза. "Для апрацоўкі беларускага экспартнага грузу задзейнічана 14 партоў Расійскай Федэрацыі. Прапрацаваны схемы дастаўкі экспартных беларускіх грузаў з задзейнічаннем партоў Паўночна-Заходняй федэральнай акругі Расіі, партоў Чорнага і Азоўскага мораў, па сухапутных маршрутах у напрамку Кітая".
Расія для Беларусі заўсёды была галоўным стратэгічным партнёрам, падкрэсліў Анатоль Насеня. Аднак ва ўмовах недружалюбных дзеянняў асобных краін рэалізацыя раней вызначаных стратэгічных напрамкаў па развіцці эканамічнай інтэграцыі паскараецца. І цяпер краіны-саюзнікі паказваюць высокі ўзровень узаемадзеяння.
"Выпрацаваная кіраўнікамі нашых дзяржаў інтэграцыйная мадэль працуе. Яна дазваляе забяспечваць вырашэнне ключавых пытанняў. І самае галоўнае - дае магчымасць працаваць нашым прадпрыемствам і фінансавай сістэме, - упэўнены дэпутат. - Адзін з апошніх прыкладаў - выдзяленне Расіяй крэдытных рэсурсаў для фінансавання імпартазамяшчальных праектаў. Да канца года будуць запушчаны сем такіх праектаў на суму каля $330 млн. Важна, што ствараюцца аднолькавыя ўмовы нараўне з расійскімі кампаніямі. Расія атрымае неабходныя камплектуючыя і тавары, якія раней імпартавала з Захаду, а нашы прадпрыемствы будуць забяспечаны заказамі. Гэта акно магчымасцей нам вельмі хутка трэба выкарыстаць".
Дэпутат таксама лічыць, што палітыка калектыўнага Захаду ў адносінах да Саюзнай дзяржавы ў першую чаргу накіравана на дэстабілізацыю сітуацыі ў эканоміцы. "Мэта і задумка Захаду зразумелая, і яна ў корані эканомікі. Менавіта туды наносіцца галоўны ўдар. Сваімі недальнабачнымі і бяссэнснымі дзеяннямі яны падвялі эканоміку да глабальнага крызісу. Калі ў пачатку года яны зрабілі сабе стрэл у нагу, то цяпер ужо можна гаварыць пра стрэл у галаву. Дастаткова пачытаць навіны заходніх краін, як яны "выйгралі" ад рэстрыкцый у адносінах да расійскіх энергакрыніц. Падобная сітуацыя складваецца і з прадуктамі харчавання. Цяперашняя зіма пакажа, хто меў рацыю, а хто вінаваты. Думаю, грамадзяне гэтых краін яшчэ скажуць дзякуй сваім палітыкам", - рэзюмаваў Анатоль Насеня.-0-
