13 красавіка, Мінск /Кар. БЕЛТА/. Дэфіцыт рэспубліканскага бюджэту ў I квартале 2021 года склаў каля Br1,7 млрд. Аб гэтым паведаміў сёння журналістам міністр фінансаў Юрый Селіверстаў, перадае карэспандэнт БЕЛТА.
"Даходы рэспубліканскага бюджэту за першы квартал склалі Br5,617 млрд. Гэта 109 працэнтаў да ўзроўню студзеня - сакавіка 2020 года. Сума расходаў вышэйшая - Br7,385 млрд. Дэфіцыт рэспубліканскага бюджэту за першы квартал склаўся ў суме Br1,768 млрд. Мы знаходзімся ў планавых параметрах, бюджэт быў першапачаткова сфарміраваны з дэфіцытам. Мы планава ўключаем нашы астаткі для фінансавання дэфіцыту бюджэту", - сказаў Юрый Селіверстаў.
Паводле яго слоў, даходы паступаюць у планавым парадку, якіх-небудзь значных адхіленняў няма. "Што датычыцца расходаў, то ў прыярытэце заработная плата, падтрымка Фонду сацыяльнай абароны насельніцтва. ФСАН за квартал аказана падтрымка ў аб'ёме каля Br700 млн, што звязана ў тым ліку з бальнічнымі. Асноўныя сацыяльныя абавязацельствы выконваюцца", - падкрэсліў міністр.
Што датычыцца даходаў мясцовых бюджэтаў, то яны выраслі ў параўнанні з аналагічным перыядам мінулага года прыкладна на 14 працэнтаў. "Мясцовыя бюджэты таксама сфарміраваны з дэфіцытам. Але ў першым квартале даходы перасягнулі расходы і ў іх склаўся прафіцыт у памеры Br159 млн, таму гэтыя паказчыкі лепшыя за планавыя. І гэта нягледзячы на дадатковыя расходы на выплату кавідных надбавак, на медыкаменты", - адзначыў Юрый Селіверстаў.-0-
