15 жніўня, Мінск /Кар. БЕЛТА/. Рост цэн звязаны з аб'ектыўнымі фактарамі: падаражэннем лагістыкі, сыравіны і матэрыялаў. Аб гэтым у эфіры тэлеканала СТБ заявіў міністр антыманапольнага рэгулявання і гандлю Аляксей Багданаў, паведамляе БЕЛТА.
"Наша міністэрства за бягучае паўгоддзе на 34 працэнты павялічыла аб'ём праверачных мерапрыемстваў. За гэты час было праверана больш як 3,6 тыс. аб'ектаў, якія займаюцца гандлем. Асноўная функцыя - папераджальная. Калі мы знаходзім заўвагі, то даём час на іх выпраўленні. Калі парушэнне на гэтым жа аб'екце паўторнае, то выпісваецца штраф. У цэлым гэту работу праводзіць не толькі МАРГ, але і Камітэт дзяржкантролю. Акрамя таго, кіраўнік дзяржавы даручыў Федэрацыі прафсаюзаў, Савету Рэспублікі ажыццяўляць своеасаблівы грамадскі кантроль. Інфармацыю яны накіроўваюць нам, і мы дадаткова апрацоўваем гэтыя матэрыялы. Гэта значыць, мы агульнымі намаганнямі кантралюем цэнаўтварэнне і выкананне заканадаўства аб гандлі па ўсёй краіне", - расказаў Аляксей Багданаў.
Паводле яго слоў, парушэнняў на аб'ектах гандлю стала менш у параўнанні з мінулым годам на 8 працэнтаў: "За паўгоддзе па нашых прадпісаннях суды аштрафавалі на суму больш як Br1,3 млн. У мінулым годзе гэта сума за ўвесь год складала Br1,2 млн".
Ён адзначыў, што цэны на тавары розных груп, як харчовых, так і нехарчовых, растуць прыкладна аднолькавымі тэмпамі. "За 12 месяцаў гэтыя тавары падаражэлі на 10-20 працэнтаў. Гэта сведчыць аб аб'ектыўнасці падаражэння. Інфляцыя ва ўсім свеце б'е рэкорды, таму даражэе лагістыка, сыравіна і матэрыялы. Гэта ўплывае і на фарміраванне цэн на ўнутраным рынку. Хоць урад прымае каласальныя меры па стрымліванні, і сёння мы адзіная краіна ў свеце, дзе рэгулююцца і кантралююцца больш як 50 працэнтаў тавараў", - рэзюмаваў міністр антыманапольнага рэгулявання і гандлю.-0-
