16 чэрвеня, Мінск /Кар. БЕЛТА/. Неабходна ўдасканаліць прававую базу, каб у поўнай меры рэалізаваць патэнцыял іпатэкі. Аб гэтым заявіў першы намеснік міністра эканомікі Юрый Чабатар, выступаючы з дакладам на пасяджэнні восьмай сесіі Савета Рэспублікі, паведамілі БЕЛТА ў прэс-службе Мінэканомікі.
Як адзначыў Юрый Чабатар, прапанаваныя новаўвядзенні ў закон "Аб іпатэцы" ўлічваюць паспяховы вопыт іншых дзяржаў, перш за ўсё ЕАЭС. Зацвярджэнне гэтых прававых норм дасць магчымасць пашырыць магчымасць атрымання іпатэчнага крэдыту, гарантуючы належную абарону залогатрымальнікаў.
Ён пералічыў ключавыя змяненні закона "Аб іпатэцы".
Больш дакладна вызначаны прадмет іпатэкі. З-пад дзеяння закона выведзена іпатэка шматгадовых насаджэнняў, паветраных і марскіх суднаў, касмічных аб'ектаў. "Норма хоць і тэхнічная, але ўстараняе прававы прабел", - сказаў Юрый Чабатар.
Уведзена паняцце "сузалогатрымальнікі". "Інакш кажучы, некалькі асоб могуць валодаць роўнымі правамі на атрыманне забеспячэння з кошту прадмета іпатэкі", - растлумачыў ён.
Характарыстыкі прадмета іпатэкі могуць змяняцца, але гэта ніяк не ўплывае на дагаворныя абавязацельствы.
Крэдытаатрымальнік абавязаны інфармаваць залогатрымальніка аб прад'яўленні правоў на перададзеную ў іпатэку маёмасць трэціх асоб, узнікненні пагрозы пашкоджання ці знішчэння прадмета іпатэкі альбо заключэнні дагавора, які змяняе рэжым перададзенай у іпатэку маёмасці.
Устанаўліваюцца наступствы невыканання ўмоў здачы маёмасці ў арэнду, бязвыплатнай перадачы ў карыстанне. Пры спагнанні такой маёмасці усе правы трэціх асоб спыняюцца.
Новаўвядзенне з важным сацыяльным эфектам: "Калі ў даўжніка ёсць іншая маёмасць, за кошт якой могуць быць задаволены патрабаванні залогатрымальніка і памер пратэрміноўкі параўнальна невялікі, спагнана можа быць яна, а не жыллё ў іпатэцы", - расказаў Юрый Чабатар.
Удасканалены падыходы да парадку перадачы ў іпатэку капітальнага будынка з ізаляванымі памяшканнямі або машына-месцамі. "Пры перадачы будынка ў іпатэку цалкам, пад яе таксама трапляюць усе памяшканні. Але не наадварот", - дадаў першы намеснік міністра эканомікі.
Прадаўжаецца тэрмін для звароту па дзяржрэгістрацыю з трох да шасці месяцаў. Гэта звязана з тым, што патрабуецца час на ацэнку і ўзгадненні.
Паводле слоў першага намесніка кіраўніка эканамічнага ведамства, змяненні, якія ўносяцца ў закон "Аб іпатэцы", дадуць магчымасць пашырыць правы залогадавальнікаў на атрыманне іпатэкі і выкананне абавязацельстваў, павысіць зацікаўленасць банкаў у развіцці рынку іпатэчнага жылля, у тым ліку праз суфінансаванне.-0-
