Чабатар: тэхналагічная бяспека павінна стаць ключавым прыярытэтам галіновых праграм

4 красавіка, Мінск /Кар. БЕЛТА/. Тэхналагічная бяспека павінна стаць ключавым прыярытэтам галіновых праграм. Аб гэтым заявіў міністр эканомікі Юрый Чабатар у ходзе пасяджэння сумеснай калегіі Міністэрства эканомікі і Дзяржаўнага камітэта па навуцы і тэхналогіях, паведамілі БЕЛТА ў прэс-службе Мінэканомікі.

Паводле слоў кіраўніка эканамічнага ведамства, у бліжэйшы час дзяржорганы-рэгулятары пачынаюць распрацоўку стратэгій развіцця галін на 10 гадоў. У сувязі з гэтым агульная задача Мінэканомікі і ДКНТ - забяспечыць спалучанасць гэтых дакументаў з мэтамі Нацыянальнай стратэгіі ўстойлівага развіцця і праектнымі ініцыятывамі Комплекснага прагнозу навукова-тэхнічнага прагрэсу (КП НТП).

"Пэўная работа праведзена ўжо: сумесна з зацікаўленымі падрыхтаваны больш за 25 тэхналагічных карт для развіцця галін. Па сутнасці, гэта гатовы алгарытм фарміравання вытворчых ланцужкоў: ад сыравіны і матэрыялаў да гатовай прадукцыі. Плануецца, што найбольш значныя праекты будуць рэалізаваны ў нафтахіміі, машынабудаванні, фармацэўтыцы, дрэваапрацоўцы, вытворчасці будматэрыялаў. Наступны этап - неабходна прааналізаваць тэхкарты на прадмет спалучанасці іх з КП НТП, дапрацаваць з улікам абазначаных у прагнозе новых тэхналогій і тавараў і ў канчатковым выніку выйсці на адпаведныя інвестыцыйныя праекты", - адзначыў Юрый Чабатар.-0-