10 мая, Мінск /Кар. БЕЛТА/. Абноўлены комплекс мер па запуску новага інвестыцыйнага цыкла палепшыць умовы для інвесціравання і вядзення бізнесу ў Беларусі. Аб гэтым сказаў першы намеснік міністра эканомікі Юрый Чабатар, паведамілі БЕЛТА ў прэс-службе Мінэканомікі.
Як адзначыў Юрый Чабатар, удасканаленне інвестыцыйнага асяроддзя Беларусі - стратэгічны напрамак работы міністэрства, накіраваны на забеспячэнне доўгатэрміновага эканамічнага росту.
"У мінулым годзе рэалізацыя комплексу мер па запуску новага інвестыцыйнага цыкла дала магчымасць значна павысіць канкурэнтаздольнасць дзеючага заканадаўства. Так, удасканалены законы "Аб інвестыцыях" і "Аб свабодных эканамічных зонах". Вялася распрацоўка праекта змяненняў закона "Аб дзяржаўна-прыватным партнёрстве". Зацверджаны Нацыянальны план дзеянняў па развіцці зялёнай эканомікі на пяцігодку. Палепшаны прававы рэжым індустрыяльнага парка "Вялікі камень" і ўмовы правядзення аперацый з каштоўнымі паперамі", - падкрэсліў ён.
Першы намеснік прэм'ер-міністра Мікалай Снапкоў 25 красавіка зацвердзіў абноўлены комплекс мер па запуску новага інвестыцыйнага цыкла. Юрый Чабатар адзначыў, што дакумент накіраваны на далейшае ўдасканаленне заканадаўства ў сферы інвестыцый.
"Прадоўжыцца прывядзенне ў адпаведнасць з патрабаваннямі часу закона аб дзяржаўна-прыватным партнёрстве. Для стымулявання і ўдасканалення ўкладання інвестыцый у эканоміку, актуалізацыі ўмоў рэалізацыі інвестпраектаў і падтрымкі асоб, якія іх рэалізуюць, стартавала работа па трансфармацыі ў закон палажэнняў дэкрэта нумар 10. Таксама прадугледжваюцца мерапрыемствы для далейшага развіцця тэрыторый індустрыяльнага парка "Вялікі камень" і свабодных эканамічных зон", - расказаў першы намеснік міністра эканомікі.
Паводле яго слоў, асобны блок мер накіраваны на зніжэнне выдаткаў інвестараў пры рэалізацыі сваіх праектаў. Размова ідзе аб рашэннях, накіраваных на паскарэнне інвестыцыйнага цыкла пры будаўніцтве, а таксама на ўдасканаленне зямельна-маёмасных адносін.
Акрамя таго, прадоўжыцца работа па стымуляванні інвестыцый у рэгіёны Беларусі, галоўнымі сярод якіх з'яўляюцца гарады з насельніцтвам звыш 80 тыс. чалавек. Акцэнт будзе зроблены на фарміраванні інвестыцыйных пляцовак і вызначэнні сістэмных падыходаў па развіцці гэтых тэрыторый. Гэта дапаможа ў далейшым прыцягнуць інвестараў у гэтыя рэгіёны.
"Стратэгічны блок абноўленага комплексу мер - нарошчванне крыніц стварэння рэсурсаў і капіталу, а таксама пашырэнне сегмента доўгіх грошай у эканоміцы. Ён прадугледжвае стварэнне ўмоў для развіцця зялёнага фінансавання, укараненне інструментаў фінансавання інфраструктурных праектаў. Ахопім максімальны спектр фінінструментаў. У першую чаргу неабходна забяспечыць іх даступнасць для бізнесу", - звярнуў увагу Юрый Чабатар.
Ён адзначыў, што рэалізацыя прымаемых мер садзейнічае стварэнню канкурэнтных умоў для ажыццяўлення інвестыцый і вядзення бізнесу ў Беларусі, у тым ліку сярод дзяржаў - членаў ЕАЭС.-0-
