30 чэрвеня, Мінск /Кар. БЕЛТА/. Беларуская ўніверсальная таварная біржа прапрацоўвае пытанне ўкаранення форвардных кантрактаў на сельгаспрадукцыю, што рэалізуецца на біржавой пляцоўцы, паведаміў карэспандэнту БЕЛТА прэс-сакратар БУТБ Раман Яніў.
"Наша мэта - павышаць эфектыўнасць кіравання фінансавымі патокамі сельгаспрадпрыемстваў і згладжваць цэнавыя ваганні на прадукцыю аграрнага комплексу. Галоўная асаблівасць форварднага кантракта ў тым, што цана продажу тавару фіксуецца ў момант правядзеня біржавой здзелкі, у той час як пастаўка праводзіцца ў пэўны момант у будучым", - сказаў Раман Яніў.
Аналітыкі БУТБ лічаць, што форвардныя кантракты будуць запатрабаваны ў айчынных сельгасвытворцаў, паколькі дадуць магчымасць ім больш якасна выбудоўваць збытавую стратэгію і паскораць абарачальнасць прадукцыі. У прыватнасці, збожжа можна будзе прадаваць яшчэ да пачатку пасяўной кампаніі, тым самым вырашаючы праблему з дэфіцытам абаротных сродкаў.
Некаторыя элементы форвардных здзелак на біржы прымяняюцца ўжо сёння. Напрыклад, лесаматэрыялы могуць рэалізоўвацца на экспарт па доўгатэрміновых дагаворах, калі пастаўка праводзіцца на працягу года па меры выпуску прадукцыі. Праўда, у гэтым выпадку ў біржавым дагаворы, як правіла, прапісваецца магчымасць карэкціроўкі цаны тавару ў адпаведнасці з квартальнымі біржавымі каціроўкамі. Пры заключэнні форвардных здзелак такія карэкціроўкі не прадугледжаны: цана застаецца нязменнай на працягу ўсяго тэрміну дзеяння дагавора.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных бірж ва Усходняй Еўропе, галоўная функцыя якой - садзейнічанне беларускім прадпрыемствам у экспарце прадукцыі і прадастаўленне дапамогі замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
