21 чэрвеня, Мінск /Кар. БЕЛТА/. Беларуская ўніверсальная таварная біржа прапанавала вытворцам металу з РФ сваю пляцоўку для паставак у Беларусь і трэція краіны. Такую прапанову выказаў начальнік упраўлення таргоў металапрадукцыяй БУТБ Яўген Бурэйка на Усерасійскай канферэнцыі "Электронная камерцыя на рынку металаў" у Маскве, паведамілі БЕЛТА ў прэс-службе біржы.
"Не сакрэт, што санкцыі істотна звузілі геаграфію экспарту расійскай металапрадукцыі, таму адно з самых актуальных пытанняў на парадку дня - пераарыентацыя экспартных паставак на іншыя рынкі. Выкарыстанне біржавой пляцоўкі як дадатковага канала продажаў можа дапамагчы ў вырашэнні гэтай задачы. Прычым размова ідзе не толькі аб рынку Беларусі, што кожны год спажывае амаль 3 млн т металу. Мы гатовы прадаставіць расійскім экспарцёрам прамы доступ да спажыўцоў з краін СНД, Азіі і Афрыкі праз механізм транзітных здзелак, а гэта ўжо зусім іншыя маштабы попыту", - сказаў Яўген Бурэйка.
Паводле яго слоў, пры таргах на біржы рызыка ніжэйшая з-за выкарыстання прынцыпу "пастаўка супраць плацяжу". Пры разліках па гэтай схеме захоўваюцца інтарэсы і прадаўца, і пакупніка. "Галоўны плюс для расійскіх кампаній у тым, што яны могуць рэалізоўваць метал з адтэрміноўкай плацяжу і быць упэўненымі, што ў агавораны тэрмін аплата паступіць на іх рахунак. У сваю чаргу беларускія пакупнікі, па сутнасці, атрымліваюць бясплатны таварны крэдыт. Біржа ў гэтым выпадку выступае гарантам выканання абавязацельстваў бакамі здзелкі", - адзначыў прадстаўнік БУТБ.
Па выніках біржавых таргоў за пяць месяцаў 2022 года сума здзелак з металапрадукцыяй на БУТБ дасягнула Br889 млн, што на 12 працэнтаў больш, чым за студзень - май 2021-га. Чорныя металы і вырабы з іх склалі больш за 77 працэнтаў ад агульнага аб'ёму продажаў тавараў гэтай катэгорыі.-0-
