3 жніўня, Мінск /Кар. БЕЛТА/. Беларуская ўніверсальная таварная біржа павінна стаць драйверам электроннага гандлю ў краіне. Аб гэтым заявіў міністр антыманапольнага рэгулявання і гандлю Уладзімір Калтовіч у час сустрэчы з калектывам БУТБ, паведамілі БЕЛТА ў прэс-службе МАРГ.
"Сёння біржа мае дастатковы інтэлектуальны патэнцыял і фінансавыя магчымасці для рэалізацыі праектаў любой складанасці ў сферы электроннага гандлю. На мой погляд, менавіта ў гэтым напрамку вашаму прадпрыемству трэба рухацца ў бліжэйшыя гады, тым больш што значны тэхналагічны зачын у вас ужо ёсць", - сказаў Уладзімір Калтовіч.
На яго думку, для забеспячэння ўстойлівага развіцця і канкурэнтаздольнасці Беларусі на сусветнай арэне неабходна ствараць уласныя лічбавыя платформы ў ключавых сектарах эканомікі, каб замежны бізнес, прыходзячы на беларускі рынак, не навязваў свае тэхналагічныя рашэнні, а інтэграваўся ў лічбавую інфраструктуру краіны.
"Лічу, што біржа можа і павінна стаць драйверам электроннага гандлю ў краіне. Пры гэтым я маю на ўвазе не толькі біржавы сегмент, а электронную камерцыю ў цэлым. Тады ў нас адпадзе неабходнасць абараняць свой рынак ад замежных канкурэнтаў. У нас будзе свая лічбавая экасістэма са зручнымі інструментамі і дакладнымі правіламі работы. Замежным кампаніям трэба будзе толькі адаптавацца", - адзначыў міністр.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
