11 чэрвеня, Мінск /Кар. БЕЛТА/. Беларуская ўніверсальная таварная біржа пашырае супрацоўніцтва з Пскоўскай вобласцю (Расія), паведаміў карэспандэнту БЕЛТА прэс-сакратар БУТБ Раман Яніў.
"Выкарыстанне біржавога механізма здольна надаць імпульс развіццю гандлёва-эканамічнага супрацоўніцтва Беларусі і Пскоўскай вобласці. Пры гэтым размова ідзе аб пастаўках прадукцыі не толькі пскоўскіх прадпрыемстваў на беларускі рынак, але і трэціх краін шляхам правядзення транзітных здзелак. Цяпер гэта адзін з самых запатрабаваных інструментаў у расійскіх удзельнікаў біржавых таргоў", - заявіў начальнік упраўлення знешнеэканамічнай дзейнасці БУТБ Аляксандр Башлій на бізнес-форуме ў Гандлёва-прамысловай палаце Пскоўскай вобласці.
У мерапрыемстве прынялі ўдзел прадпрыемствы аграрнага комплексу, дрэваапрацоўчай галіны, а таксама вядучыя вытворцы тавараў прамысловага і спажывецкага прызначэння. Па выніках бізнес-форуму дасягнуты дамоўленасці аб рэалізацыі на беларускай біржавой пляцоўцы шырокага спектра піламатэрыялаў, алейнага семя і прадуктаў іх перапрацоўкі, кармавых дабавак, электратэхнічнага абсталявання, БАПЭТ-плёнак і паліэстэру, што вырабляюцца пскоўскімі кампаніямі.
Акрамя таго, кіраўніцтва ГПП Пскоўскай вобласці выказала гатоўнасць садзейнічаць БУТБ ва ўсталяванні дзелавых кантактаў з рэгіянальнымі асацыяцыямі прадпрымальнікаў і бізнес-саюзамі для арганізацыі сумесных круглых сталоў, семінараў і прэзентацый у мэтах інфармавання прадстаўнікоў дзелавых колаў Пскоўскай вобласці аб магчымасцях і перавагах работы на беларускім рынку праз гандлёвую платформу БУТБ.
"На жаль, з-за аб'ектыўных прычын у мінулым годзе наш тавараабарот з Беларуссю прыкметна знізіўся. Таму цяпер важна выкарыстоўваць любую магчымасць для актывізацыі гандлёвых адносін і аднаўлення аб'ёмаў узаемнага гандлю як мінімум да ўзроўню 2019 года. Лічу, што ўключэнне біржы ў ланцуг паставак будзе садзейнічаць дасягненню гэтай мэты", - адзначыў прэзідэнт ГПП Пскоўскай вобласці Уладзімір Зубаў.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
