18 сакавіка, Мінск /Кар. БЕЛТА/. Беларуская ўніверсальная таварная біржа і Латвійская гандлёва-прамысловая палата плануюць супрацоўнічаць у сферы біржавога гандлю, паведамілі БЕЛТА ў БУТБ.
Дамоўленасць аб узаемадзеянні па развіцці трансгранічнага біржавога гандлю дасягнута ў час праведзенага напярэдадні візіту дэлегацыі БУТБ у Рыгу. Сярод іншага бакі плануюць абменьвацца маркетынгавай інфармацыяй, садзейнічаць выхаду беларускіх і латвійскіх суб'ектаў гаспадарання на біржавы таварны рынак. У планах і арганізацыя сумесных мерапрыемстваў для павышэння інфармаванасці дзелавых колаў абедзвюх краін аб магчымасцях біржавых электронных пляцовак.
"Латвія займае трэцяе месца па колькасці акрэдытаваных на біржы кампаній і па аб'ёме праведзеных здзелак. Гэта сведчыць аб высокай зацікаўленасці латвійскага бізнесу ў рабоце на беларускім рынку. Разам з тым відавочна, што патэнцыял біржавога механізма сёння выкарыстоўваецца не ў поўнай меры. Стрымальнымі фактарамі з'яўляюцца як абмежаванасць наменклатуры тавараў, закупляемых латвійскімі ўдзельнікамі таргоў, так і недахоп інфармацыі аб перавагах гандлю праз біржу. Разлічваю, што з вашай дапамогай мы зможам прыкметна рушыць наперад у вырашэнні гэтых праблем", - адзначыў старшыня праўлення БУТБ Аляксандр Асмалоўскі ў час сустрэчы са старшынёй праўлення Латвійскай гандлёва-прамысловай палаты Янісам Эндзіньшам.
Кіраўнік Латвійскай ГПП выказаў гатоўнасць аб'яднаць намаганні і аказаць падтрымку БУТБ у прыцягненні на таргі латвійскіх прадпрыемстваў, у першую чаргу членаў палаты. "Для нас важна, каб бізнес членаў нашай палаты развіваўся, а тавараабарот паміж Латвіяй і Беларуссю дынамічна рос, - сказаў Яніс Эндзіньш. - Калі біржа зможа забяспечыць для гэтага спрыяльныя ўмовы, мы гатовы стаць вашым інфармацыйным партнёрам і рэкамендаваць біржавую пляцоўку як найбольш эфектыўны інструмент для закупкі і рэалізацыі тавараў на беларускім рынку".-0-
