27 ліпеня, Мінск /Кар. БЕЛТА/. Дамоўленасць аб развіцці супрацоўніцтва паміж Беларускай універсальнай таварнай біржай і Банкам развіцця дасягнута па выніках візіту на БУТБ кіраўніцтва УП "БР-Кансалт" (даччынае прадпрыемства Банка развіцця, якое спецыялізуецца на рэалізацыі экспартна арыентаваных інвестыцыйных праектаў), паведамілі БЕЛТА ў прэс-службе біржы.
У прыватнасці, УП "БР-Кансалт" выказала гатоўнасць аказаць садзейнічанне БУТБ у прыцягненні на біржавыя таргі аднаго з найбуйнейшых акцыянераў індустрыяльнага парка "Вялікі камень" - кітайскай карпарацыі China Merchants Group. Як чакаецца, гэта дасць магчымасць істотна павялічыць аб'ёмы рэалізацыі беларускіх тавараў у КНР з прымяненнем пляцоўкі БУТБ.
"Мы падтрымліваем цесныя кантакты з кіраўніцтвам China Merchants Group і гатовы пасадзейнічаць прыходу карпарацыі на біржавыя таргі ў якасці брокера. Упэўнены, што кітайскія партнёры будуць зацікаўлены ў супрацоўніцтве з гандлёвай пляцоўкай, дзе акумулюецца прапанаванне шырокага асартыменту запатрабаваных у Кітаі тавараў ад вядучых беларускіх вытворцаў. У сваю чаргу біржа зможа скарыстацца развітой складской інфраструктурай і лагістычнымі магчымасцямі China Merchants Group", - адзначыў дырэктар УП "БР-Кансалт" Андрэй Міцкевіч.
Старшыня праўлення БУТБ Аляксандр Асмалоўскі падкрэсліў важнасць кітайскага рынку як аднаго з ключавых драйвераў росту біржавога экспарту і выказаў зацікаўленасць працаваць у тандэме з УП "БР-Кансалт" з мэтай прыцягнення на таргі China Merchants Group і іншых буйных кітайскіх кампаній. "Цяпер на нашай пляцоўцы акрэдытаваны 48 кітайскіх удзельнікаў, але ў асноўным гэта прадпрыемствы малога і сярэдняга бізнесу. Прыход на біржу такога буйнога іграка, як China Merchants Group, значна пашырыў бы нашы магчымасці па пастаўках беларускай прадукцыі ў Кітай. Прычым гэта датычыцца не толькі піламатэрыялаў, а практычна ўсёй экспартнай таварнай наменклатуры, уключаючы рапсавы алей, малакапрадукты, мяса, гарбарны паўфабрыкат. Таму мы, безумоўна, прымаем вашу прапанову і гатовы аб'яднаць намаганні", - заявіў кіраўнік БУТБ.
Акрамя ўзаемадзеяння па развіцці беларускага экспарту, бакі таксама дамовіліся прапрацаваць варыянты інвестыцыйных праектаў з удзелам БУТБ у галіне транспарту, лагістыкі, фінансавых паслуг і іншых перспектыўных напрамкаў, звязаных з біржавым гандлем.
ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
